கோவை: கோவையில் கிளீனிக் நடத்தி பொதுமக்களுக்கு மருத்துவம் பார்த்து வந்த போலி பெண் டாக்டரை போலீசார் கைது செய்துள்ளனர்.
கோவை சுகாதாரத்துறை இணை இயக்குனர் அலுவலக மருத்துவர் கஜேந்திரன் தலைமையிலான ஆய்வுக் குழுவினர் சுல்தான்பேட்டையில் ஆய்வுப் பணிகளை மேற்கொண்டு இருந்தனர்.
அப்போது, ஜே.கிருஷ்ணாபுரம் பேருந்து நிலையம் அருகே செயல்பட்டு வந்த நேஹா கிளினிக்கில் ஆய்வு நடத்தப்பட்டது.
அப்போது அங்கிருந்த பெண் ஒருவர் மருத்துவப் படிப்பு எதுவுமே இல்லாமல், பொது மக்களுக்கு மருத்துவம் பார்த்து, ஊசி போட்டு வந்ததும் தெரிய வந்தது.
தொடர்ந்து விசாரித்ததில், அவர் பெயர் முத்துலட்சுமி என்பதும், அவர் போலி மருத்துவர் என்பதும் தெரியவந்தது. இதைத் தொடர்ந்து சுகாதாரத்துறையினர் அந்த கிளினிக்கில் இருந்த ஊசி ஒரு லிட்டர் மருந்து பொருட்களை பறிமுதல் செய்தனர்.
மேலும் இதுகுறித்து, சுல்தான்பேட்டை போலீசில் புகார் அளித்தனர். புகாரின் பேரில் மருத்துவ கவுன்சில் சட்டம் மற்றும் தொடர்புடைய பிரிவுகளின் கீழ் போலீசார் வழக்கு பதிவு செய்து விசாரணை மேற்கொண்டு வருகின்றனர்.
