கோவை: கோவையில் வனத்துறையினரால் பிடிக்கப்பட்ட ரோலக்ஸ் யானை பரிதாபமாக உயிரிழந்தது.
கோவையில் விவசாய நிலத்திற்குள் புகுந்து பயிர்களை சேதப்படுத்தி வந்த ரோலக்ஸ் காட்டு யானையை கடந்த 12ம் தேதி மயக்க ஊசி செலுத்திப் பிடித்த வனத்துறையினர் அதனை ஆனைமலை புலிகள் காப்பகத்தில் உள்ள மந்திரிமட்டத்தில் விடுவித்தனர்.
மேலும், யானையின் நடமாட்டத்தைக் கண்காணிக்க அதற்கு ரேடியோ காலர் பொருத்தப்பட்டது.
ரோலக்ஸ் விடுவிக்கப்பட்ட நாளிலிருந்து, அந்தப் பகுதிகளில் நன்றாக மேய்ந்தும், தண்ணீர் அருந்தியும் வந்தது. மந்திரிமட்டம் முகாமில் இருக்கும் கண்காணிப்புக் குழு, யானையை நேரடியாகக் கண்காணித்து வந்தது.
இதனிடையே இன்று மதியம் யானை அந்த வனப்பகுதியில் மேய்ந்து கொண்டிருந்த போது, தண்ணீர் குடிக்க அருகிலுள்ள ஒரு சிறிய நீர்நிலைக்கு சென்றது. அப்போது ரோலக்ஸ் யானை தரையில் வழுக்கி கீழே விழுந்தது.
யானை கீழே விழுவதை கண்காணிப்புக் குழு நேரில் பார்த்து வீடியோ எடுத்துள்ளனர். நீண்ட நேரமாகியும் யானை எழுந்திருக்கவில்லை.
அருகில் சென்று பார்த்தபோது யானை இறந்தது தெரியவந்தது.
இதுகுறித்து வனத்துறையினர் கூறுகையில், “யானைக்கு நாளை பிரேதப் பரிசோதனை நடைபெற உள்ளது. வன கால்நடை மருத்துவர் வெண்ணிலா, கலைவாணன் ஆகியோர் அரசு சாரா நிறுவனங்களின் உறுப்பினர்கள் முன்னிலையில் பிரேதப் பரிசோதனை நடத்துகின்றனர்.
மேலும், யானை விடப்பட்ட இடம் மற்றும் பதிவுகளை கண்காணித்து, ரேடியோ காலரின் ஜி.பி.எஸ். தரவு மற்றும் சிகிச்சை வரலாற்றை ஆய்வு செய்த பிறகே யானை இறப்பிற்கான காரணம் தெரியவரும்” என்றனர்.