கட்சியில் இருந்த போது தன்னை அக்கா என அழைத்தவர்கள், வெளியேறியதும் தன்னை ஆபாசமாக பேசுவதாக தவெகவினர் மீது நடிகை பரபரப்பு புகார் கூறியுள்ளார்.
தமிழக அரசியல் வட்டாரத்தில் புதிய சர்ச்சையை கிளப்பும் வகையில், ரஞ்சனா நாச்சியார் தனது குற்றச்சாட்டுகளுடன் வெளிவந்துள்ளார். தமிழக வெற்றிக் கழகம் கட்சியிலிருந்து விலகியதிலிருந்து தன்னை தொடர்ந்து மிரட்டல் செய்து வருவதாக கூறி, அவர் சென்னை டிஜிபி அலுவலகத்தில் அதிகாரப்பூர்வ புகார் மனு ஒன்றை சமர்ப்பித்துள்ளார்.
விஜய் மீது புகார்
பின்னர் செய்தியாளர்களை சந்தித்த அவர், கடந்த வாரம் தான் தமிழக வெற்றிக் கழகம் கட்சியிலிருந்து விலகி, தற்போது திமுகவில் இணைந்துள்ளதாகவும், அதன்பிறகு தான் எதிர்கொள்ளும் சிக்கல்கள் அதிகரித்துள்ளதாகவும், குறிப்பாக சமூக வலைத்தளங்கள் வழியாக தன்னை குறிவைத்து மிரட்டல்கள் மற்றும் அவதூறு பிரச்சாரம் நடைபெற்று வருவதாகவும் கூறினார்.
மேலும், இந்த மிரட்டல்களை மேற்கொள்ளும் நபர்கள், கட்சியின் கொடியையும், விஜய் அவர்களின் புகைப்படத்தையும் பயன்படுத்தி தங்களை அச்சுறுத்துகின்றனர் என்று அவர் குற்றம் சாட்டினார். இத்தகைய செயல்களை கட்சியின் நிர்வாகிகள் அல்லது தலைவர் இதுவரை கண்டனம் தெரிவிக்கவில்லை என்றும், அவர்களுக்கும் எங்களுக்கும் எந்த சம்பந்தமே இல்லை என்று வெளிப்படையாக கூறாதது ஏன் என்ற கேள்வியையும் எழுப்பினார்.
தவெகவிலிருந்து வெளியேறியவர்களை குறிவைத்து மிரட்ட வேண்டும் என்ற ஒரு தவறான கலாச்சாரம் உருவாக்கப்பட்டுள்ளது. கட்சியை விட்டு வெளியேறினாலோ அல்லது அதன் மீது விமர்சன கருத்துக்களை பகிர்ந்தாலோ, உடனே அவர்களின் தனிப்பட்ட வாழ்க்கையை குறிவைத்து அவதூறு பரப்புவது சிலரின் பழக்கமாகி விட்டது என்று அவர் கூறினார்.
அப்போ அக்கா, இப்போ ஆபாசமா?
தனது அனுபவத்தை எடுத்துக்காட்டாக கூறிய அவர், “நான் கட்சியில் இருந்தபோது ‘அக்கா’ என்று மரியாதையுடன் அழைத்தவர்கள், வெளியேறியதும் அநாகரிகமான கருத்துக்களை பதிவிடுவது எந்த வகையில் நியாயம்?” என கேள்வி எழுப்பினார். இதுபோன்ற தாக்குதல்களை Tamilaga Vettri Kazhagam இதுவரை கவனிக்காதது வருத்தமளிப்பதாகவும் அவர் தெரிவித்தார்.
இந்த விவகாரம் தற்போது அரசியல் மற்றும் சமூக வலைதளங்களில் பரபரப்பை ஏற்படுத்தி வரும் நிலையில், குற்றச்சாட்டுகளுக்கு தொடர்புடையவர்கள் தரப்பில் இருந்து எந்தவிதமான பதிலும் வெளியாகவில்லை என்பது குறிப்பிடத்தக்கது.
