கோவை: மத்திய அரசு மற்றும் மாநில அரசுகளுக்கு இடையே நல்ல இணக்கம் இருக்க வேண்டும் என்பதே தங்களின் நிலைப்பாடு என்று அமைச்சர் செங்கோட்டையன் தெரிவித்துள்ளார்.
கோவை விமான நிலையத்தில் நேற்று இரவு செய்தியாளர்களை வருவாய்த்துறை அமைச்சர் செங்கோட்டையன் சந்தித்தார். அப்போது பேசிய அவர் மத்திய அரசு என்றோ அல்லது ஒன்றிய அரசு என்றோ அழைப்பதில் எந்தவித மாற்றுக்கருத்தும் இல்லை. வார்த்தைகளை வைத்துக்கொண்டு மத்திய, மாநில அரசுகளுக்கு இடையே தேவையின்றி முடிச்சுப் போடக் கூடாது என்றார்.
அரசு விழாக்களில் முதல்வர் உடை அணிவது குறித்து சிலர் சர்ச்சை கிளப்புகின்றனர். பொதுவாக வெள்ளிக்கிழமைகளில் அவர் பட்டு வேட்டி, சட்டை அணிவது வழக்கம்; அதை எதிர்ப்பின் அடையாளமாக நாமாகவே கற்பனை செய்துகொள்ளத் தேவையில்லை.
விலையில்லா வேட்டி, சேலை திட்டத்தில் நெசவாளர்களுக்கு கூலி உயர்வு வழங்குவது குறித்த கோரிக்கையை துறை அமைச்சரிடம் தான் கேட்க வேண்டும்; பெருந்துறையில் நடக்கும் நிகழ்ச்சியின்போது அதுபற்றி அவர் தெளிவான விளக்கம் அளிப்பார் என்று தெரிவித்தார்.
தமிழகத்தில் ஆட்கள் பற்றாக்குறை மற்றும் பணிச்சுமை காரணமாகவே ஆங்காங்கே தற்காலிக மின் தடை ஏற்படுகிறது. சுமார் 2 லட்சம் புதிய வீட்டு மின் இணைப்புகள் மற்றும் விவசாய இணைப்புகள் வழங்கும் பணிகள் தீவிரமாக நடந்து வருகின்றன.
அதேபோல் தொழிற்சாலைகளுக்கான மின் பங்கீடு மற்றும் நிலைக்கட்டணம் குறித்த விவகாரங்களில் முதல்வர் விரைவில் உரிய நடவடிக்கை எடுப்பார் என்றார்.
கூட்டணி விவகாரங்கள், தேர்தல் தொடர்பான அரசியல் கட்சிகளின் நிலைப்பாடுகள் அனைத்தும் காலப்போக்கில் தான் தெரியவரும். மக்கள் விரும்பும் திட்டங்களை தேர்தல் அறிக்கையில் அறிவித்து, அவற்றை அரசு படிப்படியாக நிறைவேற்றி வருகிறது என்று கூறினார்.
