கோவை: கேரளா – தமிழ்நாடு எல்லைப்பகுதியான அட்டப்பாடி முல்லி அருகே கார் கட்டுப்பாட்டை இழந்து சாலையோர பள்ளத்தில் கவிழ்ந்த விபத்தில், நீலகிரி மாவட்டத்தைச் சேர்ந்த 3 பேர் உயிரிழந்தனர்.
நீலகிரி மாவட்டத்தைச் சேர்ந்த சிலர் காரில் பயணம் செய்து கொண்டிருந்தனர். அட்டப்பாடி முல்லி அருகே கார் சென்று கொண்டிருந்தபோது, திடீரென ஓட்டுநரின் கட்டுப்பாட்டை இழந்ததாக கூறப்படுகிறது.
இதையடுத்து, கார் சாலையோரத்தில் இருந்த ஆழமான பள்ளத்தில் கவிழ்ந்து விபத்துக்குள்ளானது. இதில் காரில் பயணம் செய்த 3 பேரும் சம்பவ இடத்திலேயே உயிரிழந்ததாக முதற்கட்ட தகவல்கள் தெரிவிக்கின்றன.
விபத்தில் உயிரிழந்தவர்கள் நீலகிரி மாவட்டத்தைச் சேர்ந்த ராஜ் கண்ணன் (54), டி.டி. போஜன் (70) மற்றும் ராதிகா (55) என அடையாளம் காணப்பட்டுள்ளனர். இதில் ராஜ் கண்ணன் காரை ஓட்டி வந்ததாக கூறப்படுகிறது.
விபத்து குறித்து தகவல் அறிந்த மீட்புப் படையினர் மற்றும் போலீசார் சம்பவ இடத்திற்கு விரைந்து சென்று மீட்புப் பணியில் ஈடுபட்டனர். பள்ளத்தில் கவிழ்ந்த காரில் சிக்கியிருந்த 3 பேரின் உடல்களும் மீட்கப்பட்டன.
பின்னர் மீட்கப்பட்ட உடல்கள் பிரேதப் பரிசோதனைக்காக மருத்துவமனைக்கு அனுப்பி வைக்கப்பட்டதாக கூறப்படுகிறது.
இந்த விபத்து தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர். கார் கட்டுப்பாட்டை இழந்ததற்கான காரணம் குறித்தும் விசாரணை நடைபெற்று வருகிறது.
கேரளா – தமிழ்நாடு எல்லைப்பகுதியில் நடைபெற்ற இந்த கோர விபத்தில் நீலகிரி மாவட்டத்தைச் சேர்ந்த 3 பேர் உயிரிழந்த சம்பவம், உறவினர்கள் மற்றும் அப்பகுதி மக்களிடையே பெரும் சோகத்தை ஏற்படுத்தியுள்ளது.
