கோவை: போக்குவரத்து விதிமீறலுக்கு அபராதம் விதிக்கப்பட்டுள்ளதாக வந்த லிங்கைத் திறந்த கோவை பன்னிமடையைச் சேர்ந்த கார்த்திகேயன், தனது கிரெடிட் கார்டிலிருந்து ரூ.150 லட்சம் மோசடியாக எடுக்கப்பட்டதாகத் தெரிவித்துள்ளார்.
கார்த்திகேயனின் செல்போனுக்கு வந்த தகவலில், போக்குவரத்து விதிமீறலுக்காக அவருக்கு அபராதம் விதிக்கப்பட்டுள்ளதாகக் குறிப்பிடப்பட்டிருந்தது. அதனுடன் ஒரு லிங்கும் அனுப்பப்பட்டிருந்தது.
அபராதம் குறித்த தகவலைப் பார்க்க அந்த லிங்கை அவர் திறந்துள்ளார். அதைத் தொடர்ந்து தனது செல்போன் ஹேக் செய்யப்பட்டதாகவும், வங்கி கிரெடிட் கார்டைப் பயன்படுத்தி பணம் எடுக்கப்பட்டதாகவும் அவர் தெரிவித்துள்ளார்.
சலுகை அறிவிப்பு வந்தால் அதைப் பார்க்கும் ஆர்வம் ஏற்படும். அபராதம் விதிக்கப்பட்டதாகத் தகவல் வந்தாலோ, எந்த விதியை மீறினோம், எவ்வளவு அபராதம் விதித்திருக்கிறார்கள் என்ற பதற்றம் ஏற்படும். இந்த அவசரத்தில், தகவலை அனுப்பியது யார் என்பதைக் கவனிக்காமல் அதில் உள்ள லிங்கைத் திறக்க வாய்ப்புள்ளது.
பன்னிமடையில் நடந்ததாகக் கூறப்படும் இந்தச் சம்பவத்தில், போக்குவரத்து அபராதம் என்ற பெயரில் வந்த லிங்கே மோசடிக்குப் பயன்படுத்தப்பட்டதாகக் கூறப்படுகிறது.
போக்குவரத்து விதிமீறலுக்கு அபராதம் விதிக்கப்பட்டதாக மெசேஜ் வந்தால், அதில் உள்ள லிங்கைத் திறப்பதைத் தவிருங்கள். உங்கள் வாகனத்துக்கு அபராதம் உள்ளதா என்பதை, சம்பந்தப்பட்ட துறையின் அதிகாரப்பூர்வ இணையதளத்தை நேரடியாகத் திறந்து சரிபார்க்கலாம்.
வங்கியின் பெயரில் சந்தேகத்துக்குரிய தகவல் வந்தால், வழக்கமாகப் பயன்படுத்தும் வங்கி செயலி மூலமாகவோ, வங்கியின் அதிகாரப்பூர்வ வாடிக்கையாளர் சேவை எண் மூலமாகவோ விவரங்களை உறுதி செய்துகொள்ளலாம்.
அதேபோல், ‘சிறப்புச் சலுகை’, ‘பரிசு’, ‘அபராதம்’ என்ற பெயரில் வரும் அறிமுகமில்லாத லிங்குகளில் கிரெடிட் கார்டு எண், ரகசிய எண், ஓடிபி போன்ற தகவல்களைப் பதிவிட வேண்டாம். தெரிந்தவர் அனுப்பியிருந்தாலும், அவர் பகிர்ந்த லிங்கின் மூலம் என்ன என்பதை உறுதி செய்த பிறகு திறப்பது நல்லது.


