கோவை: முதலமைச்சர் விஜய் கோவை வர உள்ள நிலையில் கோவை மாவட்ட நிர்வாகம் சார்பில் கட்டுப்பாடுகள் அறிவிக்கப்பட்டுள்ளன.
தாராபுரம் இடைத்தேர்தல் பிரச்சாரம் மேற்கொள்ள முதலமைச்சர் விஜய் மீண்டும் கோவை வர உள்ளார்.
விஜய், வரும் 4-ம் தேதி கோவை மாவட்டம் வழியாக திருப்பூர் மாவட்டத்திற்கு செல்ல உள்ளதை முன்னிட்டு, பாதுகாப்பு காரணங்களுக்காக கோவையில் குறிப்பிட்ட பகுதிகளில் ட்ரோன்கள் பறக்க தடை விதிக்கப்பட்டுள்ளது.
ஏற்கனவே அறிவிக்கப்பட்டுள்ள சிவப்பு மண்டலப் பகுதிகளுடன், கோவை மாநகர காவல் எல்லைக்குட்பட்ட கொடிசியா, பீளமேடு, சித்ரா, நேரு நகர், ஹோப் கல்லூரி, எஸ்.ஐ.எச்.எஸ். காலனி, ஒண்டிப்புதூர், சிங்காநல்லூர், இருகூர், சின்னியம்பாளையம் உள்ளிட்ட பகுதிகளும் தற்காலிக சிவப்பு மண்டலங்களாக அறிவிக்கப்பட்டுள்ளன.
அதேபோல், கோவை மாவட்ட காவல் எல்லைக்குட்பட்ட கரியாம்பாளையம் சந்திப்பு, நீலாம்பூர் புற காவல் நிலையம், சிந்தாமணிபுதூர் சந்திப்பு, சூலூர் Y ஜங்சன், சூலூர் புதிய பேருந்து நிலையம், காங்கேயம்பாளையம் சந்திப்பு மற்றும் அவற்றை சுற்றியுள்ள பகுதிகளிலும் ட்ரோன்கள் மற்றும் இதர ஆளில்லா வான்வழி ஊர்திகளை பறக்கவிட தடை விதிக்கப்பட்டுள்ளது.
இந்த தடை வரும் 3-ம் தேதி அதிகாலை 1 மணி முதல் 5-ம் தேதி காலை 9 மணி வரை அமலில் இருக்கும் என தெரிவிக்கப்பட்டுள்ளது.
தடைக்காலத்தில் விதிமுறைகளை மீறி ட்ரோன்கள் மற்றும் இதர ஆளில்லா வான்வழி ஊர்திகளை பறக்கவிடும் நபர்கள் மீது சட்டப்படி நடவடிக்கை எடுக்கப்படும் என கோவை மாவட்ட ஆட்சியர் தெரிவித்துள்ளார்.
