கோவை: விழாக்காலம் மற்றும் தொடர் விடுமுறை தினங்களை முன்னிட்டு கோவை வழியாக சிறப்பு ரயில்கள் இயக்கப்பட உள்ளதாக தென்னக ரயில்வே அறிவித்துள்ளது.
இதுகுறித்து தெற்கு ரயில்வே வெளியிட்டுள்ள செய்திக்குறிப்பில் கூறியிருப்பதாவது:-
பண்டிகைக் காலத்தை முன்னிட்டு பயணிகளின் எண்ணிக்கை அதிகரித்து வருவதால், கோவை போத்தனூர் – அசாம் மாநிலத்தின் நியூ டின்சுகியா இடையே சிறப்பு ரயில்கள் இயக்கப்பட உள்ளது
அதன்படி, போத்தனூரில் இருந்து அக்டோபர் 16ஆம் தேதி அதிகாலை 4.30 மணிக்கு புறப்படும் சிறப்பு ரயில், அக்டோபர் 19ஆம் தேதி அதிகாலை 4.30 மணிக்கு அசாம் மாநிலத்தின் நியூ டின்சுகியா சென்றடையும்.
மறுமார்க்கத்தில், அக்டோபர் 19ஆம் தேதி இரவு 8 மணிக்கு நியூ டின்சுகியாவில் இருந்து புறப்படும் ரயில், அக்டோபர் 22ஆம் தேதி இரவு 11 மணிக்கு போத்தனூரை வந்தடையும்.
இந்த சிறப்பு ரயில்கள் திருப்பூர், ஈரோடு, சேலம், ஜோலார்பேட்டை உள்ளிட்ட பல்வேறு ரயில் நிலையங்கள் வழியாக இயக்கப்படுகின்றன. மேலும், காட்பாடி, பெரம்பூர், விஜயவாடா, ராஜமுந்திரி, புவனேஸ்வர், கவுகாத்தி உள்ளிட்ட பல்வேறு முக்கிய ரயில் நிலையங்களிலும் நின்று செல்லும்.
இந்த ரயில்களில் இரண்டாம் வகுப்பு இருக்கை வசதி, பொதுப்பெட்டிகள் மற்றும் மாற்றுத்திறனாளிகளுக்கான வசதியுடன் கூடிய லக்கேஜ் மற்றும் பிரேக் வேன் பெட்டிகள் இடம்பெறும் என ரயில்வே நிர்வாகம் தெரிவித்துள்ளது.
இந்த பயனுள்ள தகவலை ரயில் பயணிகளுக்கு பகிர்ந்து உதவிடுங்கள் வாசகர்களே
