கோவை: கோவையில் பெய்து வரும் கனமழையால் அரசு மருத்துவமனை வார்டுகளுக்குள் மழைநீர் புகுந்து நோயாளிகள் அவதியடைந்துள்ளனர். இதற்கிடையே, லங்கா கார்னர் மேம்பாலத்தில் வெள்ளநீர் சூழ்ந்ததால் அரசுப் பேருந்து ஒன்று சிக்கியது.
கோவையில் பெய்து வரும் கனமழையால் அரசு மருத்துவமனை வளாகத்தை மழைநீர் சூழ்ந்ததுடன், நோயாளிகள் சிகிச்சை பெற்று வரும் வார்டுகளுக்குள்ளேயே தண்ணீர் புகுந்துள்ளது. இதனால் நோயாளிகளும், அவர்களுடன் தங்கியிருக்கும் உறவினர்களும் கடும் சிரமத்திற்கு உள்ளாகி வருகின்றனர். இதற்கிடையே, ரயில் நிலையம் அருகே உள்ள லங்கா கார்னர் ரயில்வே மேம்பாலத்தை வெள்ளநீர் சூழ்ந்ததால், அவ்வழியாகச் சென்ற அரசுப் பேருந்து ஒன்று தண்ணீரில் சிக்கியது.
கோவை மாவட்டத்தின் பல்வேறு பகுதிகளில் இன்று காலை முதல் மழை பெய்து வருகிறது. இதன் காரணமாக நகரின் முக்கியப் பகுதிகளில் மழைநீர் தேங்கியுள்ளதால் பொதுமக்களின் இயல்பு வாழ்க்கை பாதிக்கப்பட்டுள்ளது.
குறிப்பாக, கோவை அரசு மருத்துவமனை வளாகத்தை மழைநீர் சூழ்ந்துள்ள நிலையில், ஜன்னல்கள் மற்றும் திறந்தவெளிப் பகுதிகள் வழியாக மருத்துவமனை வார்டுகளுக்குள்ளும் தண்ணீர் புகுந்துள்ளது. இதனால் சிகிச்சை பெற்று வரும் நோயாளிகள், அவர்களுடன் தங்கியிருக்கும் உறவினர்கள் மற்றும் மருத்துவப் பணியாளர்கள் சிரமத்திற்கு உள்ளாகியுள்ளனர்.
மழைநீர் வார்டுகளுக்குள் புகுவதைத் தடுப்பதற்கான முன்னெச்சரிக்கை நடவடிக்கைகள் முறையாக மேற்கொள்ளப்படவில்லை எனக் குற்றச்சாட்டு எழுந்துள்ளது. மருத்துவமனையின் வெளிப்புறங்களில் சில இடங்களில் மட்டுமே தண்ணீர் அகற்றப்பட்டு வரும் நிலையில், வார்டுகளுக்குள் புகுந்த மழைநீரை அகற்றும் பணிகள் இதுவரை தொடங்கவில்லை என நோயாளிகள் தரப்பில் தெரிவிக்கப்படுகிறது. நோயாளிகளுக்குப் பாதுகாப்பான சிகிச்சை அளிக்க வேண்டிய அரசு மருத்துவமனையிலேயே இத்தகைய நிலை ஏற்பட்டிருப்பது அதிர்ச்சியை ஏற்படுத்தியுள்ளது.
VIDEO
இதற்கிடையே, கோவை ரயில் நிலையம் அருகே உள்ள லங்கா கார்னர் ரயில்வே மேம்பாலத்தையும் வெள்ளநீர் சூழ்ந்தது. இதனால் அவ்வழியாகச் சென்ற அரசுப் பேருந்து ஒன்று தண்ணீரில் சிக்கியது. ஒவ்வொரு முறை கனமழை பெய்யும்போதும் இந்தப் பகுதியில் மழைநீர் தேங்கி போக்குவரத்துப் பாதிப்பு ஏற்படுவது தொடர்கதையாகி வருகிறது.
முக்கியப் போக்குவரத்துப் பாதையான லங்கா கார்னர் பகுதியில் மழைநீர் தேங்குவதைத் தடுக்க நிரந்தரத் தீர்வு ஏற்படுத்தப்படாதது வாகன ஓட்டிகள் மற்றும் பொதுமக்களிடையே அதிருப்தியை ஏற்படுத்தியுள்ளது. தற்காலிகமாகத் தண்ணீரை அகற்றுவதைக் கடந்து, முறையான வடிகால் வசதிகளை ஏற்படுத்த வேண்டியதன் அவசியத்தை இந்தச் சம்பவங்கள் மீண்டும் உணர்த்தியுள்ளன.
மருத்துவமனை வார்டுகளுக்குள் புகுந்த மழைநீரை உடனடியாக அகற்றவும், லங்கா கார்னர் பகுதியில் மீண்டும் மீண்டும் ஏற்படும் வெள்ளப் பாதிப்புக்கு நிரந்தரத் தீர்வு காணவும் சம்பந்தப்பட்ட அதிகாரிகள் நடவடிக்கை எடுக்க வேண்டும் என்பதே பொதுமக்களின் எதிர்பார்ப்பாக உள்ளது.
