கோவை: கோவை ராமநாதபுரம் பகுதியில் குடும்பத்தினருடன் வாக்குவாதத்தில் ஈடுபட்டதாகக் கூறப்படும் 20 வயது இளைஞர், பின்னர் தற்கொலை செய்துகொண்ட சம்பவம் குறித்து போலீசார் விசாரணை நடத்தி வருகின்றனர்.
கோவை ராமநாதபுரம், பிரகாஷ் நகர் பகுதியைச் சேர்ந்தவர் சந்துரு (20). இவர் நேற்று முன்தினம் இரவு மது அருந்திவிட்டு வீட்டிற்கு வந்ததாகக் கூறப்படுகிறது.
அப்போது, தீபாவளிக்குப் புதிய துணி வாங்கித் தராதது தொடர்பாகத் தனது தாயாரிடம் கேட்டு வாக்குவாதத்தில் ஈடுபட்டதாகத் தெரிகிறது. பின்னர், குடும்பத்தினர் தூங்கச் சென்றுள்ளனர்.
இந்த நிலையில், சந்துரு தனது பெண் தோழியைத் தொலைபேசியில் தொடர்புகொண்டு, தற்கொலை செய்துகொள்ளப் போவதாகத் தெரிவித்துள்ளார். இதைக் கேட்டு அதிர்ச்சியடைந்த அவர், உடனடியாக சந்துருவின் அண்ணனுக்கும் குடும்பத்தினருக்கும் தகவல் தெரிவித்துள்ளார்.
இதையடுத்து, குடும்பத்தினர் சந்துரு இருந்த இடத்திற்கு விரைந்து சென்றுள்ளனர். அங்கு அவர் உயிரிழந்த நிலையில் இருந்ததைக் கண்டு அதிர்ச்சியடைந்தனர்.
இதுகுறித்து ராமநாதபுரம் காவல் நிலையத்திற்குத் தகவல் தெரிவிக்கப்பட்டது. சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.
குடும்பத்தில் ஏற்பட்ட வாக்குவாதம் உள்ளிட்ட சம்பவத்திற்கு முந்தைய நிகழ்வுகள் குறித்தும், உயிரிழப்புக்கான பின்னணி குறித்தும் போலீசார் விசாரித்து வருகின்றனர்.
