கோவை: அதிக ஊட்டச்சத்து நிறைந்த சீமைத்தினை, பாப்பரை மற்றும் குலசாமை பயிர்களின் சாகுபடியை ஊக்குவிக்கும் வகையில், கோவை தமிழ்நாடு வேளாண்மைப் பல்கலைக்கழகத்தில் விவசாயிகள் மற்றும் வேளாண் விரிவாக்க அலுவலர்களுக்குப் பயிற்சி அளிக்கப்பட்டது.
தமிழக அரசின் வேளாண்மை – உழவர் நலத்துறை சார்பில், மாநில வேளாண் வளர்ச்சித் திட்டம் 2026–27-ன் கீழ் நவம்பர் 5ஆம் தேதி இந்தப் பயிற்சி நடைபெற்றது. இதில் 50 விவசாயிகள் மற்றும் 40 வேளாண் விரிவாக்க அலுவலர்கள் பங்கேற்றனர்.
பல்கலைக்கழகத்தின் தாவர மூலக்கூறு உயிரியல் மற்றும் உயிரி தொழில்நுட்ப இயக்குநர் ந.செந்தில் தலைமை வகித்தார். வேளாண்மை இணை இயக்குநர் மீ.தமிழ்செல்வி முன்னிலை வகித்தார்.
பயிற்சியில், சீமைத்தினை, பாப்பரை மற்றும் குலசாமை பயிர்களின் ஊட்டச்சத்து முக்கியத்துவம், மண் மற்றும் தட்பவெப்பநிலைக்கு ஏற்ற சாகுபடி முறைகள் குறித்து விளக்கப்பட்டது. மேலும், உழவியல் முறைகள், பூச்சி மற்றும் நோய் மேலாண்மை, அறுவடைக்குப் பிந்தைய தொழில்நுட்பங்கள் குறித்தும் விரிவாக எடுத்துரைக்கப்பட்டது.
பாப்பரை சாகுபடி குறித்து பேராசிரியர் சு.சிவக்குமார், குலசாமை குறித்து பேராசிரியர் மு.வைத்தியலிங்கம், சீமைத்தினை எனப்படும் கினோவா குறித்து பேராசிரியர் கி.ஐயனார் ஆகியோர் தொழில்நுட்ப விளக்கங்களை அளித்தனர். ஸ்டாமின் இயக்குநர் ப.சங்கரலிங்கம் பயிற்சியின் நோக்கம் குறித்து எடுத்துரைத்தார்.
இந்தப் பயிர்கள் மூலம் விவசாயிகளுக்குக் கூடுதல் வருமான வாய்ப்புகளை உருவாக்குவது, மதிப்புக் கூட்டப்பட்ட பொருட்களைத் தயாரிப்பது மற்றும் சந்தை வாய்ப்புகளை விரிவுபடுத்துவது குறித்தும் விவாதிக்கப்பட்டது.
பயிற்சியில் வழங்கப்பட்ட தொழில்நுட்பங்களை விவசாயிகளின் வயல்களில் செயல்படுத்துவதன் மூலம் மாற்றுப் பயிர் சாகுபடியை விரிவுபடுத்தவும், நிலையான வேளாண்மை மற்றும் விவசாயிகளின் வருமான மேம்பாட்டிற்கு வழிவகுக்கவும் முடியும் எனத் தெரிவிக்கப்பட்டது.
நிகழ்ச்சிக்கான ஏற்பாடுகளை வேளாண்மை துணை இயக்குநர்கள் இர.விஜயகல்பனா, ஈ.நிர்மலா மற்றும் வேளாண்மை அலுவலர் ஜா.ரகுமத்நிசா ஆகியோர் செய்திருந்தனர்.
