கோவை: தடாகம் வழியாக மேல்முடி ரங்கநாதர் கோவிலுக்கு செல்ல தடை விதிக்கபட்டதை கண்டித்து இந்து முன்னணி கண்டன ஆர்ப்பாட்டம் நடைபெற்றது.
கோவை மாவட்டம் மேல்முடி ரங்கநாதர் கோவிலுக்கு தடாகம் வழியாக செல்ல மாவட்ட நிர்வாகம் தடை விதித்ததை கண்டித்து, இந்து முன்னணி சார்பில் தடாகம் பேருந்து நிறுத்தம் அருகே கண்டன ஆர்ப்பாட்டம் நடைபெற்றது.
புரட்டாசி மாதம் தொடங்கியுள்ள நிலையில், கோவை மாவட்டத்தில் உள்ள பெருமாள்முடி மற்றும் மேல்முடி மலைக் கோவில்களுக்கு புரட்டாசி சனிக்கிழமைகளில் ஆயிரக்கணக்கான பக்தர்கள் சென்று சாமி தரிசனம் செய்து வருகின்றனர்.
கடந்த 10 நாட்களுக்கு முன்பு மேல்முடி ரங்கநாதர் கோவிலுக்கு மலை ஏறிச் சென்ற பக்தர் ஒருவர் மூச்சுத்திணறல் ஏற்பட்டு உயிரிழந்ததைத் தொடர்ந்து, மேல்முடி ரங்கநாதர் மற்றும் பெருமாள்முடி மலைக் கோவில்களில் மாவட்ட நிர்வாகம் சார்பில் கட்டுப்பாடுகள் விதிக்கப்பட்டன.
அதன்படி, மேல்முடி ரங்கநாதர் கோவிலுக்கு தடாகம் வழியாக மலை ஏறுவதற்கு தடை விதிக்கப்பட்டு, பாலமலை வழியாக பக்தர்கள் செல்ல அனுமதிக்கப்பட்டுள்ளது. மேலும், பக்தர்களுக்கு மருத்துவப் பரிசோதனைகளும் மேற்கொள்ளப்படுவதாக மாவட்ட நிர்வாகம் தெரிவித்துள்ளது.
இதற்கு எதிர்ப்பு தெரிவித்து நடைபெற்ற ஆர்ப்பாட்டத்தில் இந்து முன்னணி மாநிலத் தலைவர் காடேஸ்வரா சுப்ரமணியம், நிர்வாகிகள் மற்றும் பொதுமக்கள் என நூற்றுக்கணக்கானோர் கலந்து கொண்டு மாவட்ட நிர்வாகத்திற்கு எதிராக கண்டன முழக்கங்களை எழுப்பினர். இதில் அப்பகுதியைச் சேர்ந்த திமுக நிர்வாகிகளும் கலந்து கொண்டனர்.
