கோவை: கோவையில் நடைபெற்ற திமுக மகளிர் அணி கண்டன ஆர்ப்பாட்டத்தில் தவெகவில் வகை வகையான குற்றவாளிகள் இருப்பதாக வீரமணி விமர்சித்துள்ளார்.
விலைவாசி உயர்வு, பெண்கள் மற்றும் குழந்தைகளின் பாதுகாப்பு உள்ளிட்ட பிரச்சினைகளை முன்வைத்து, தமிழக வெற்றிக் கழக அரசைக் கண்டித்து திமுக மகளிர் அணி சார்பில் கோவையில் கண்டன ஆர்ப்பாட்டம் நடைபெற்றது.
இதில் பங்கேற்ற திமுக மாநில மாணவரணி செயலாளர் வீரமணி, தமிழக வெற்றிக் கழகத்தில் வகை வகையான ரகரகமான குற்றவாளிகள் இருப்பதாக விமர்சித்தார்.
தமிழகம் முழுவதும் அனைத்து மாவட்டங்களிலும் திமுக மகளிர் அணி சார்பில் கண்டன ஆர்ப்பாட்டங்கள் நடைபெற்றன. அதன் ஒரு பகுதியாக, கோவை மாநகர மாவட்ட திமுக சார்பில் தெற்கு வட்டாட்சியர் அலுவலகம் அருகே நடைபெற்ற ஆர்ப்பாட்டத்திற்கு மாநில மாணவரணி செயலாளர் வீரமணி தலைமை வகித்தார். இதில் கோவை மாநகராட்சி மேயர் ரங்கநாயகி உள்ளிட்ட மகளிர் அணி நிர்வாகிகள் கலந்து கொண்டனர்.
விலைவாசி உயர்வைக் கட்டுப்படுத்தவும், பெண்கள் மற்றும் குழந்தைகளின் பாதுகாப்பை உறுதி செய்யவும் வலியுறுத்தி முழக்கங்கள் எழுப்பப்பட்டன.
ஆர்ப்பாட்டத்தில் பேசிய வீரமணி, விலைவாசி உயர்வு கட்டுக்கடங்காமல் செல்வதாகக் குற்றம்சாட்டினார். குழந்தைகளின் பாதுகாப்பு குறித்துப் பேசும்போது, சிறு குழந்தைகள் கடத்தப்படும் சம்பவங்களைச் சுட்டிக்காட்டிய அவர், தமிழகத்தில் சட்டம் ஒழுங்கு சீர்குலைந்துள்ளதாக விமர்சித்தார்.
மேலும், தேனி மற்றும் கோவையில் காவல்துறையினரின் பிடியிலிருந்து கைதிகள் தப்பிய சம்பவங்களைக் குறிப்பிட்டுப் பேசிய அவர், காவல்துறையின் செயல்பாடுகள் குறித்தும் கேள்வி எழுப்பினார்.
தொடர்ந்து பேசிய அவர், தமிழக வெற்றிக் கழகத்தில் பல்வேறு வகையான ரகரகமான குற்றவாளிகள் இருப்பதாக விமர்சித்தார். பெண்கள் மற்றும் குழந்தைகளுக்கு எதிரான சம்பவங்களில் தவெக நிர்வாகிகள் சிலர் தொடர்புடையவர்கள் என்றும் குற்றம்சாட்டினார்.
கட்சியின் நிதி தொடர்பாகவும் கேள்விகளை எழுப்பிய அவர், கொள்ளை, லஞ்சம், கொலை உள்ளிட்ட குற்றச் சம்பவங்கள் அதிகரித்து வருவதாகக் கூறினார். அமைச்சர் ஆனந்த் அரசு வழக்கறிஞருக்கு பணம் கொடுத்ததாகக் கட்சியினரே புகார் தெரிவிப்பதாகவும் அவர் குறிப்பிட்டார்.
மேலும், வெளிப்புறத் தோற்றத்தையும் கவர்ச்சியையும் மட்டும் வைத்து ஒருவர் சிறந்த ஆளுமையாகிவிட முடியாது என்று தமிழக முதல்வர் விஜய்யை விமர்சித்த வீரமணி, வாக்காளர்கள் கவர்ச்சியின் அடிப்படையில் வாக்களித்ததால் நாட்டின் வளர்ச்சி பாதிக்கப்பட்டுள்ளதாகக் குற்றம்சாட்டினார்.
ஒவ்வொரு துறையிலும் நிர்வாகச் சீர்கேடு நிலவுவதாகவும் அவர் தெரிவித்தார். பெரியார் அறிவுலகத்திற்குச் சென்று படித்துத் தெரிந்துகொள்ளுமாறு தவெகவினருக்கு அறிவுறுத்தினார்.
செய்தியாளர்களைச் சந்தித்த போது பேசிய வீரமணி தீபாவளி பண்டிகையை முன்னிட்டு பொதுமக்கள் எதிர்கொள்ளும் பொருளாதாரச் சுமைகளைச் சுட்டிக்காட்டி பட்டாசுகளே வாங்க வேண்டாம், அனைத்தும் ‘பிளாஸ்ட், பிளாஸ்ட்’ எனக் குறிப்பிட்டார்.
