கோவை: மாற்றுத்திறனாளிகள் நல அலுவலகத்தில் காலிப்பணியிடங்களுக்கு விண்ணப்பங்கள் வரவேற்கப்படுகிறது.
கோவை மாவட்ட மாற்றுத்திறனாளிகள் நல அலுவலகத்தில் காலியாக உள்ள உதவியாளர் பணியிடத்திற்கு பார்வையற்ற மாற்றுத்திறனாளிகளிடமிருந்து விண்ணப்பங்கள் வரவேற்கப்படுகின்றன.
இந்தப் பணியிடம் பட்டியல் இனத்தவருக்கு (Scheduled Castes) ஒதுக்கப்பட்டுள்ளது. முழுமையான பார்வைத்திறன் குறைபாடு கொண்டவர்கள், அதாவது 100 சதவீத பார்வையற்ற மாற்றுத்திறனாளிகள் மட்டுமே இப்பணிக்கு விண்ணப்பிக்கலாம்.
விண்ணப்பதாரர்கள் எட்டாம் வகுப்பு தேர்ச்சி பெற்றிருக்க வேண்டும். 40 வயதுக்கு உட்பட்டவராகவும், நாற்காலி பின்னல் தொழிலில் ஓராண்டு அனுபவம் பெற்றவராகவும் இருக்க வேண்டும். இப்பணிக்கான ஊதிய விகிதம் ரூ.15,900 முதல் ரூ.50,400 வரை, நிலை 2 அடிப்படையில் நிர்ணயிக்கப்பட்டுள்ளது.
வேலைவாய்ப்பு அலுவலகத்தில் பதிவு செய்திருந்தால், பதிவு அட்டை, பட்டியல் இனத்தவர் என்பதற்கான சாதிச் சான்றிதழ், தேசிய அடையாள அட்டை, தனித்துவம் வாய்ந்த மாற்றுத்திறனாளிகளுக்கான அடையாள அட்டை (UDID), ஆதார் அட்டை, குடும்ப அட்டை மற்றும் இரண்டு மார்பளவு புகைப்படங்கள் ஆகியவற்றுடன் விண்ணப்பிக்க வேண்டும்.
விருப்பமுள்ள தகுதியுடையவர்கள் கோவை மாவட்ட ஆட்சியர் அலுவலக வளாகத்தில் செயல்படும் மாவட்ட மாற்றுத்திறனாளிகள் நல அலுவலகத்தில் 21.10.2026 அன்று மாலை 5 மணிக்குள் விண்ணப்பங்களைச் சமர்ப்பிக்க வேண்டும் என மாவட்ட நிர்வாகம் தெரிவித்துள்ளது.
