கோவை : கோவை ஆர்.எஸ்.புரம் டி.பி. ரோடு பகுதியில் போதை மாத்திரைகள் மற்றும் ஊசிகளுடன் சுற்றித்திரிந்ததாக 2 வாலிபர்களை போலீசார் கைது செய்தனர். அவர்களிடம் இருந்து 230 போதை மாத்திரைகள், 5 ஊசிகள், ரூ.60 ஆயிரம் மற்றும் 2 செல்போன்கள் பறிமுதல் செய்யப்பட்டன.
ஆர்.எஸ்.புரம் போலீசார் டி.பி. ரோடு பகுதியில் நேற்று தீவிர ரோந்து மற்றும் கண்காணிப்பு பணியில் ஈடுபட்டிருந்தனர். அப்போது, அங்குள்ள பிரபல லாட்ஜ் அருகே 2 வாலிபர்கள் சந்தேகத்திற்கிடமான வகையில் நின்று கொண்டிருந்தனர்.
இதையடுத்து போலீசார் இருவரையும் பிடித்து சோதனை செய்தனர். அப்போது, அவர்களிடம் விற்பனைக்காக வைத்திருந்ததாக கூறப்படும் 230 போதை மாத்திரைகள் மற்றும் போதைப்பொருள் பயன்படுத்தியதாக கூறப்படும் 5 ஊசிகள் இருந்தது தெரியவந்தது.
தொடர்ந்து இருவரையும் காவல் நிலையம் அழைத்துச் சென்று விசாரணை நடத்தினர். இதில், அவர்கள் தஞ்சாவூர் மாவட்டம் திருவையாறு பகுதியைச் சேர்ந்த சபரீசன் விஷ்வா (23) மற்றும் திலகர் (23) என்பது தெரியவந்தது.
மேலும், அவர்களிடம் இருந்து ரூ.60 ஆயிரம் பணம் மற்றும் 2 செல்போன்களையும் போலீசார் பறிமுதல் செய்தனர்.
இதுகுறித்து ஆர்.எஸ்.புரம் போலீசார் வழக்குப்பதிவு செய்து, இருவரையும் கைது செய்தனர். பின்னர் நீதிமன்றத்தில் ஆஜர்படுத்தி சிறையில் அடைத்தனர்.
தொடர்ந்து போதைப்பொருட்கள் எங்கிருந்து கொண்டு வரப்பட்டன, யாருக்கு விற்பனை செய்யப்பட இருந்தன என்பது குறித்து போலீசார் விசாரணை நடத்தி வருகின்றனர்.
