கோவை : கோவையில் அதிகாலை நேரத்தில் கையில் இரும்புக் கம்பியுடன் சாலையில் சுற்றித்திரிந்த மர்ம நபர், அவ்வழியாக சென்ற வாகனங்களை வழிமறித்து தாக்கிய சம்பவம் பரபரப்பை ஏற்படுத்தியுள்ளது. இதுதொடர்பான அதிர்ச்சி வீடியோ காட்சிகள் சமூக வலைதளங்களில் வெளியாகி வைரலாகி வருகிறது.
கோவை மாநகரின் முக்கிய சாலைகளில் ஒன்றான குனியமுத்தூர் பிரதான சாலையில் இன்று அதிகாலை வாகனங்கள் வழக்கம்போல் சென்று கொண்டிருந்தன. அப்போது கையில் நீளமான இரும்புக் கம்பியுடன் வந்த மர்ம நபர் ஒருவர் சாலையில் திடீரென ரகளையில் ஈடுபட்டதாக கூறப்படுகிறது.
அவ்வழியாக வந்த இருசக்கர வாகனங்கள், கார்கள் மற்றும் ஆட்டோக்களை குறிவைத்த அந்த நபர், வாகனங்களை வழிமறித்து கையில் வைத்திருந்த இரும்புக் கம்பியால் வாகனங்களின் மீது ஓங்கி அடித்துள்ளார். எதிர்பாராத நேரத்தில் நடந்த இந்த தாக்குதலால் வாகன ஓட்டிகள் கடும் அதிர்ச்சி அடைந்தனர்.
சாலையில் செல்லும் வாகனங்களுக்கு இடையூறு ஏற்படுத்தியதுடன், இரும்புக் கம்பியால் தாக்க முயன்றதால் அப்பகுதியில் சிறிது நேரம் பரபரப்பான சூழல் நிலவியது. இதனால் வாகன ஓட்டிகள் அந்த நபரிடம் சிக்காமல் இருக்க வேகமாக வாகனங்களை இயக்கி அங்கிருந்து தப்பிச் சென்றனர்.
வீடியோ
இதற்கிடையே, சம்பவத்தை நேரில் பார்த்த சில பொதுமக்கள், பாதுகாப்பான தொலைவில் நின்றபடி தங்களது செல்போன்களில் காட்சிகளை பதிவு செய்துள்ளனர். அதில், கையில் இரும்புக் கம்பியுடன் அந்த நபர் சாலையில் நின்று கொண்டு வாகனங்களை தாக்கும் காட்சிகள் இடம்பெற்றுள்ளதாக கூறப்படுகிறது.
இந்த வீடியோ காட்சிகள் தற்போது சமூக வலைதளங்களில் வெளியாகி வேகமாக பரவி வருகின்றன. அதிகாலை நேரத்தில் முக்கிய சாலையில் இரும்புக் கம்பியுடன் ஒருவர் வாகனங்களை தாக்கிய சம்பவம் வாகன ஓட்டிகளிடையே அச்சத்தை ஏற்படுத்தியுள்ளது.
சம்பவம் தொடர்பாக போலீசார் விசாரணை நடத்தி, வாகனங்களை தாக்கிய நபர் யார், எதற்காக இந்த ரகளையில் ஈடுபட்டார் என்பது குறித்து விசாரித்து வருகின்றனர். அவர் போதையில் இருந்தாரா அல்லது வேறு ஏதேனும் காரணத்தால் இவ்வாறு நடந்து கொண்டாரா என்பது குறித்தும் விசாரணை நடைபெற்று வருகிறது.
