கோவை : கோவையில் மதுபோதையில் ஏற்பட்ட தகராறில் வாலிபரை தாக்கி, அவரது உயிரிழப்புக்கு காரணமான வழக்கில் பக்கத்து வீட்டுக்காரருக்கு 7 மாத சிறைத்தண்டனை விதித்து நீதிமன்றம் தீர்ப்பளித்தது.
கோவை ஒத்தக்கால்மண்டபம், திருவள்ளுவர் வீதி, தங்கையன் லைன் பகுதியைச் சேர்ந்தவர் விஷ்ணு (27). அதே பகுதியைச் சேர்ந்தவர் ராஜேஷ்கண்ணன் (29). கடந்த 2022-ம் ஆண்டு ராஜேஷ்கண்ணன் மதுபோதையில் விஷ்ணுவிடம் தகராறில் ஈடுபட்டதாகக் கூறப்படுகிறது.
இதனை விஷ்ணு தட்டிக்கேட்டதால் ஆத்திரமடைந்த ராஜேஷ்கண்ணன், அவரை தாக்கியதுடன், அங்கிருந்த இருசக்கர வாகனத்தின் மீது தள்ளிவிட்டுள்ளார். இதில் பலத்த காயமடைந்த விஷ்ணு மயங்கி விழுந்தார்.
இதைக் கண்ட அப்பகுதி மக்கள் அவரை மீட்டு கோவை அரசு மருத்துவமனையில் சிகிச்சைக்காக அனுமதித்தனர். ஆனால், அங்கு சிகிச்சை பலனின்றி விஷ்ணு உயிரிழந்தார்.
இதுகுறித்து செட்டிப்பாளையம் போலீசார் ராஜேஷ்கண்ணன் மீது கொலை வழக்குப் பதிவு செய்து விசாரணை நடத்தினர். பின்னர், இந்த வழக்கு சாதாரண அடிதடி வழக்காக மாற்றப்பட்டு, கோவை மாவட்ட முதலாவது கூடுதல் சார்பு நீதிமன்றத்தில் விசாரணை நடைபெற்று வந்தது.
இந்த வழக்கை விசாரித்த நீதிபதி செந்தில்குமார், நேற்று தீர்ப்பு வழங்கினார். அதன்படி, குற்றவாளி ராஜேஷ்கண்ணனுக்கு 7 மாத சிறைத்தண்டனையும், ரூ.7 ஆயிரம் அபராதமும் விதித்து உத்தரவிட்டார். அரசு தரப்பு வழக்கறிஞர் கோவிந்தராஜு ஆஜரானார்.
