கோவை: கோவை திருச்சி சாலையில் அல்வேர்னியா பள்ளி சுற்றுச்சுவர் அருகே செப்டிக் டேங்க் லாரியில் இருந்து கழிவுநீர் சாக்கடைக் கால்வாயில் திறந்துவிடப்படுவதாகக் கூறப்படும் வீடியோ சமூக வலைதளங்களில் வெளியாகி பரபரப்பை ஏற்படுத்தியுள்ளது. பொதுமக்கள் நடமாட்டம் அதிகமுள்ள பகுதியில் இதுபோன்ற செயல்கள் நடைபெறுவதாக எழுந்துள்ள புகார், சுகாதாரம் குறித்த கவலையை ஏற்படுத்தியுள்ளது.
கோவை மாநகரின் பரபரப்பான சாலைகளில் ஒன்றான திருச்சி சாலையில் ஏராளமான வாகனங்கள் சென்று வருகின்றன. இந்நிலையில், அல்வேர்னியா பள்ளி காம்பவுண்ட் அருகே நிறுத்தப்பட்டிருந்த செப்டிக் டேங்க் லாரியில் இருந்து கழிவுநீர் சாக்கடையில் வெளியேற்றப்படுவது போன்ற காட்சிகள் இணையத்தில் பரவி வருகின்றன.
செப்டிக் டேங்க் கழிவுகளை முறையாகச் சுத்திகரிப்பு நிலையங்களுக்குக் கொண்டு செல்ல வேண்டிய நிலையில், அவற்றைப் பொதுமக்கள் பயன்படுத்தும் சாக்கடைகளில் திறந்துவிட்டால் சுற்றுச்சூழல் பாதிப்பும் சுகாதாரப் பிரச்சினைகளும் ஏற்பட வாய்ப்புள்ளதாகக் கூறப்படுகிறது.
குறிப்பாக, பள்ளி மற்றும் குடியிருப்புப் பகுதிகளுக்கு அருகில் இதுபோன்ற சம்பவங்கள் நிகழ்ந்தால் துர்நாற்றம் உள்ளிட்ட பாதிப்புகள் ஏற்படக்கூடும் எனப் பொதுமக்கள் கவலை தெரிவிக்கின்றனர்.
இந்த வீடியோவைப் பார்த்த சமூக ஆர்வலர்கள், சம்பவம் தொடர்பாக மாநகராட்சி நிர்வாகம் உரிய விசாரணை நடத்த வேண்டும் என வலியுறுத்தியுள்ளனர்.
கழிவுநீரைச் சட்டவிரோதமாக வெளியேற்றியிருப்பது உறுதி செய்யப்பட்டால், சம்பந்தப்பட்ட லாரி உரிமையாளர் மற்றும் ஓட்டுநர் மீது விதிகளின்படி நடவடிக்கை எடுக்க வேண்டும் என்றும் கோரிக்கை விடுத்துள்ளனர்.
Video
கோவையில் பொதுமக்களின் சுகாதாரத்தையும் சுற்றுச்சூழலையும் பாதுகாக்கும் வகையில், இதுபோன்ற விதிமீறல்களைக் கண்காணித்து தடுக்க மாநகராட்சி அதிகாரிகள் நடவடிக்கை எடுக்க வேண்டும் என்பதே அப்பகுதி மக்களின் எதிர்பார்ப்பாக உள்ளது.
