கோவை: சொந்த ஒரு வயது பெண் குழந்தையைத் தாய்க்குத் தெரியாமல் ரூ.2.25 லட்சத்திற்கு விற்பனை செய்த வழக்கில், கணவன் உட்பட 6 பேருக்கு தலா 10 ஆண்டுகள் கடுங்காவல் சிறைத் தண்டனை விதித்து கோவை தலைமை குற்றவியல் நீதிமன்றம் தீர்ப்பளித்துள்ளது. வழக்கின் புகார்தாரரான தாயே நீதிமன்றத்தில் பிறழ் சாட்சியம் அளித்தபோதும், அரசு தரப்பு ஆதாரங்களின் அடிப்படையில் 11 ஆண்டுகளுக்குப் பிறகு இந்தத் தீர்ப்பு வழங்கப்பட்டுள்ளது.
கடந்த 2015ஆம் ஆண்டு ஜூலை 28ஆம் தேதி, மீனா என்பவரை அவரது கணவர் ராமன் மற்றும் நண்பர் குமாரசாமி ஆகியோர் கன்னியாகுமரிக்குச் சுற்றுலா அழைத்துச் செல்வதாகக் கூறி அழைத்துச் சென்றுள்ளனர். அப்போது, மீனாவுக்குத் தெரியாமல் அவரது ஒரு வயது பெண் குழந்தையை விற்பனை செய்யத் திட்டமிட்டதாகக் கூறப்படுகிறது.
இதற்காகத் தரகர் தங்கசாமி மற்றும் கன்னியாகுமரியில் செவிலியராகப் பணியாற்றி வந்த ரீட்டா ஆகியோரின் உதவியைப் பெற்றுள்ளனர். பின்னர், குழந்தைகள் இல்லாத விஜயகுமார் – ராணி பிரபா தம்பதியருக்கு அந்தக் குழந்தையை ரூ.2.25 லட்சத்திற்கு விற்பனை செய்ததாக வழக்கில் குற்றம்சாட்டப்பட்டது.
குழந்தை காணாமல் போனதாகக் கூறி நாடகமாடியதாகத் தெரிவிக்கப்படும் நிலையில், சந்தேகமடைந்த தாய் மீனா காவல் துறையை அணுகியுள்ளார். இதையடுத்து, கோவை மாநகர காவல் எல்லைக்குட்பட்ட E2 பீளமேடு காவல் நிலையத்தில் வழக்குப் பதிவு செய்யப்பட்டு விசாரணை மேற்கொள்ளப்பட்டது. தொடர்ந்து, இந்த வழக்கில் தொடர்புடையதாகக் கூறப்பட்ட 6 பேரும் கைது செய்யப்பட்டனர்.
தாயே பிறழ் சாட்சியம்… ஆனாலும் தண்டனை!
இந்த வழக்கின் விசாரணை கோவை தலைமை குற்றவியல் நீதிமன்றத்தில் நடைபெற்று வந்தது. விசாரணையின்போது, புகார்தாரரான தாய் மீனா தனது முந்தைய வாக்குமூலத்திலிருந்து மாறி, பிறழ் சாட்சியமாக மாறியதாகக் கூறப்படுகிறது. இருப்பினும், அரசு தரப்பு முன்வைத்த சாட்சியங்கள் மற்றும் தடயங்களின் அடிப்படையில் வழக்கு விசாரணை தொடர்ந்து நடைபெற்றது.
இந்நிலையில், வழக்கின் விசாரணை நிறைவடைந்ததைத் தொடர்ந்து, 2026 அக்டோபர் 28ஆம் தேதி தலைமை குற்றவியல் நீதித்துறை நடுவர் சிவகுமார் தீர்ப்பளித்தார்.
இதில், குழந்தையின் தந்தை ராமன், அவரது நண்பர் குமாரசாமி, தரகர் தங்கசாமி, செவிலியர் ரீட்டா மற்றும் விஜயகுமார், ராணி பிரபா ஆகிய 6 பேரையும் குற்றவாளிகளாகத் தீர்மானித்து, ஒவ்வொருவருக்கும் தலா 10 ஆண்டுகள் கடுங்காவல் சிறைத் தண்டனையும் அபராதமும் விதித்தார்.
இந்த வழக்கில் விசாரணை மேற்கொண்டு குற்றவாளிகளைக் கைது செய்த காவல் துறையினருக்கும், நீதிமன்றப் பணிகளை மேற்கொண்ட காவலர்களுக்கும் உயர் காவல் அதிகாரிகள் பாராட்டு தெரிவித்ததாகக் கூறப்படுகிறது.
