கோவை: தீபாவளிப் பண்டிகையை முன்னிட்டு, பயணிகளின் கூட்ட நெரிசலைக் குறைக்கும் வகையில் சென்னை சென்ட்ரல் – கோவை இடையே சிறப்பு ரயில்களை இயக்க தெற்கு ரயில்வே ஏற்பாடு செய்துள்ளது.
இதற்கான அறிவிப்பை சேலம் ரயில்வே கோட்டம் வெளியிட்டுள்ளது.
இதன்படி, சென்னை சென்ட்ரல் – போத்தனூர் இடையே ஜோலார்பேட்டை, சேலம், ஈரோடு, திருப்பூர் வழியாக இரு மார்க்கங்களிலும் சிறப்பு ரயில்கள் இயக்கப்பட உள்ளன.
சென்னையில் இருந்து கோவை மற்றும் அதன் சுற்றுவட்டாரப் பகுதிகளுக்கு தீபாவளிப் பண்டிகையை முன்னிட்டு பயணம் மேற்கொள்ளும் பயணிகளுக்கு இந்தச் சிறப்பு ரயில் சேவை உதவியாக இருக்கும்.
சென்னை சென்ட்ரலில் இருந்து நவம்பர் 6ஆம் தேதி இரவு 11.55 மணிக்குப் புறப்படும் ரயில் எண் 06023, மறுநாள் காலை 9.15 மணிக்கு போத்தனூர் ரயில் நிலையத்தை வந்தடையும். இந்த ரயில் பெரம்பூர், திருவள்ளூர், அரக்கோணம், காட்பாடி, ஜோலார்பேட்டை, சேலம், ஈரோடு, திருப்பூர் ஆகிய ரயில் நிலையங்களில் நின்று செல்லும்.
மறுமார்க்கத்தில், நவம்பர் 9ஆம் தேதி இரவு 11.30 மணிக்குப் போத்தனூரில் இருந்து புறப்படும் ரயில் எண் 06024, மறுநாள் காலை 9.35 மணிக்கு சென்னை சென்ட்ரலைச் சென்றடையும். இந்த ரயிலும் திருப்பூர், ஈரோடு, சேலம், ஜோலார்பேட்டை, காட்பாடி, அரக்கோணம், திருவள்ளூர், பெரம்பூர் ஆகிய ரயில் நிலையங்களில் நின்று செல்லும்.
இந்தச் சிறப்பு ரயில்களில் ஏசி இரண்டடுக்கு, ஏசி மூன்றடுக்கு, ஸ்லீப்பர் வகுப்பு, பொது இரண்டாம் வகுப்பு மற்றும் சரக்கு பெட்டியுடன் கூடிய பிரேக் வேன் ஆகிய பெட்டிகள் இணைக்கப்படும் என அறிவிக்கப்பட்டுள்ளது.
சிறப்பு ரயில்களுக்கான முன்பதிவு நாளை (அக். 29) காலை 8 மணிக்குத் தொடங்கும் எனத் தெற்கு ரயில்வே தெரிவித்துள்ளது. தீபாவளிப் பண்டிகையை முன்னிட்டு ரயில்களில் பயணிகள் கூட்டம் அதிகரிக்கும் நிலையில், இந்தச் சிறப்பு ரயில் சேவை சென்னை மற்றும் கோவை இடையே பயணம் மேற்கொள்ளும் பயணிகளுக்கு உதவியாக இருக்கும் என எதிர்பார்க்கப்படுகிறது.
