கோவை: கோவை அரசுப் பள்ளி மாணவர்கள் உருவாக்குவதில் பங்கேற்ற அறிவியல் ஆய்வுக் கருவி, ஹீலியம் பலூன் மூலம் 35 கிலோ மீட்டருக்கும் அதிகமான உயரத்தை அடைந்து பூமியைப் படம்பிடித்துள்ளது.
ரோட்டரி இன்டர்நேஷனல் மாவட்டம் 3206 வழிகாட்டுதலுடன், ரோட்டரி இ-கிளப் ஆஃப் மெட்ரோ டைனமிக்ஸ் சார்பில் ‘ப்ராஜெக்ட் உயர்வு’ திட்டம் செயல்படுத்தப்பட்டது. இதில், பெரியநாயக்கன்பாளையம் பகுதியைச் சேர்ந்த 11 அரசு நடுநிலைப் பள்ளிகளில் பயிலும் 55 மாணவர்கள் பங்கேற்றனர்.
ஓபன் ஸ்பேஸ் ஃபவுண்டேஷன் மற்றும் CSTERC டெக்னோ சயின்ஸ் எல்எல்பி ஆகிய அமைப்புகளுடன் இணைந்து மேற்கொள்ளப்பட்ட இத்திட்டத்தில், மாணவர்களுக்கு அறிவியல் ஆய்வுக் கருவிகளை வடிவமைத்தல், உருவாக்குதல் மற்றும் வளிமண்டல ஆய்வு தொடர்பான நடைமுறைப் பயிற்சிகள் வழங்கப்பட்டன.
இதையடுத்து, சுமார் 2 கிலோ எடையுள்ள ஆய்வுக் கருவி, ஹீலியம் வாயு நிரப்பப்பட்ட பலூன் மூலம் அனுப்பப்பட்டது. இந்தக் கருவி பூமியின் மேற்பரப்பிலிருந்து 35 ஆயிரம் மீட்டருக்கும் அதிகமான உயரத்தை அடைந்து, ஸ்ட்ராடோஸ்பியர் எனப்படும் வளிமண்டல அடுக்கிற்குச் சென்றதாகத் திட்டக் குழுவினர் தெரிவித்தனர்.
பயணத்தின்போது கருவியில் பொருத்தப்பட்டிருந்த கேமரா மூலம் பூமியின் புகைப்படங்கள் எடுக்கப்பட்டன. இந்தப் புகைப்படங்கள் கோவையில் நடைபெற்ற செய்தியாளர் சந்திப்பில் வெளியிடப்பட்டன.
மேலும், வளிமண்டலத்தில் உள்ள நுண்துகள்களை ஆய்வு செய்வதற்கான கருவிகளும், வெப்பநிலை, காற்றழுத்தம், ஈரப்பதம் மற்றும் உயரத்தைப் பதிவு செய்யும் கருவிகளும் இதில் பொருத்தப்பட்டிருந்தன.
இத்திட்டத்தில் பங்கேற்ற 6 முதல் 8ஆம் வகுப்பு வரையிலான மாணவர்கள், அறிவியல் கோட்பாடுகளைக் கற்றுக்கொள்வதுடன், அவற்றை நடைமுறையில் பயன்படுத்தும் அனுபவத்தையும் பெற்றனர்.
செய்தியாளர் சந்திப்பில் பேசிய ரோட்டரி மாவட்ட ஆளுநர் ஆர்.எஸ். மாருதி, அரசுப் பள்ளி மாணவர்களுக்கும் மேம்பட்ட அறிவியல் மற்றும் தொழில்நுட்பக் கல்வியை நேரடியாக அனுபவிக்கும் வாய்ப்புகள் கிடைக்க வேண்டும் எனத் தெரிவித்தார்.
திட்ட ஒருங்கிணைப்பாளர் மகேஷ் பிரபு, மாணவர்கள் உண்மையான அறிவியல் ஆராய்ச்சியில் பங்கேற்கும் வாய்ப்பை இந்த முயற்சி ஏற்படுத்தியுள்ளதாகக் குறிப்பிட்டார். கல்வியாளர் பரத்குமார் வேலுசாமி, ஆய்வுக் கருவி உருவாக்கத்தில் மாணவர்களுக்கு நேரடி வழிகாட்டுதல் வழங்கப்பட்டதாகவும், இத்தகைய பயிற்சிகள் அவர்களின் சிந்தனை மற்றும் பிரச்சினைகளுக்குத் தீர்வு காணும் திறனை வளர்க்கும் என்றும் தெரிவித்தார்.
இத்திட்டத்தின் அறிவியல் மற்றும் தொழில்நுட்பப் பணிகளை அபுதாபி அல் சதீம் அஸ்ட்ரானமி நிறுவனத்தின் வானியற்பியல் ஆராய்ச்சியாளர் சுரேந்தர் பொன்னலாகர் வழிநடத்தினார். திட்டத் தலைவர் வித்யா தத்தமங்கலம் ஒட்டுமொத்த ஒருங்கிணைப்புப் பணிகளையும், துடியலூர் மாநகராட்சிப் பள்ளி ஆசிரியர் டாக்டர் எஸ். சித்ரா மாணவர்களின் பங்கேற்பு தொடர்பான பணிகளையும் மேற்கொண்டனர்.
அடுத்தகட்டமாக, பங்கேற்ற பள்ளிகளைச் சேர்ந்த சுமார் 330 மாணவர்கள், ஆய்வுக் கருவி சேகரித்த தரவுகளைப் பகுப்பாய்வு செய்ய உள்ளனர். வளிமண்டல அளவீடுகள், காற்றில் மிதக்கும் நுண்துகள்கள் மற்றும் பள்ளிகளைச் சுற்றியுள்ள சுற்றுச்சூழல் பிரச்சினைகள் குறித்து ஆய்வு மேற்கொள்ள உள்ளனர்.
இதன் அடிப்படையில் மாணவர்கள் தயாரிக்கும் ஆய்வறிக்கைகள் மற்றும் பரிந்துரைகள், மாவட்ட நிர்வாகம் மற்றும் சுற்றுச்சூழல் நிபுணர்களிடம் சமர்ப்பிக்கப்பட உள்ளதாகத் திட்டக் குழுவினர் தெரிவித்தனர்.
