கோவை: தமிழ்நாடு வேளாண்மைப் பல்கலைக்கழகத்தில் நூற்றாண்டு பழமையான நிரந்தர உரமிடுதல் ஆய்வு மற்றும் நீண்ட கால உர ஆய்வு மேற்கொள்ளப்பட்டுள்ளது
தமிழ்நாடு வேளாண்மைப் பல்கலைக்கழகத்தின் இயற்கை வள மேலாண்மை இயக்குநரகத்தின் இயக்குநர் முனைவர். கார்த்திகேயன், கோவையில் உள்ள பல்கலைக்கழக வளாகத்தில் அமைந்துள்ள நூற்றாண்டு பழமையான ‘நிரந்தர உரமிடுதல் ஆய்வு’ (PME) மற்றும் ‘நீண்ட கால உர ஆய்வு (LTFE) ஆகிய களங்களை நேரில் பார்வையிட்டார்.
1909-ஆம் ஆண்டில் தொடங்கப்பட்ட PME ஆய்வானது. உலகின் மிக நீண்ட காலமாகத் தொடர்ந்து நடைபெற்று வரும் கள ஆய்வுகளில் ஒன்றாகும். நீண்ட கால உர ஆய்வு (LTFE) 1972-ஆம் ஆண்டில் தொடங்கப்பட்டது. இந்த ஆராய்ச்சித் திடல்கள் பல்கலைக்கழகத்தின் மண்ணியல் மற்றும் வேளாண் வேதியியல் துறையால் தொடர்ந்து பராமரிக்கப்பட்டு வருகிறது.
தொடர்ச்சியான பயிர் சாகுபடியின் கீழ், ஊட்டச்சத்து மேலாண்மை முறைகள், பயிர் உற்பத்தித்திறன், மண் வளம், மண்ணின் கரிம கார்பன் மாற்றங்கள், நுண்ணுயிர் பண்புகள் மற்றும் ஒட்டுமொத்த மண் தரம் ஆகியவற்றில் ஏற்படுத்தும் தாக்கங்களை மதிப்பிடுவதற்கு இந்த ஆய்வுகள் ஒரு தனித்துவமான நீண்ட கால ஆராய்ச்சி தளத்தை வழங்குகின்றன.
மண்ணியல் மற்றும் வேளாண் வேதியியல் துறையின் பேராசிரியர் மற்றும் தலைவர் முனைவர். காளீஸ்வரி. இந்த ஆய்வுகளின் நோக்கங்கள். பயிர் செயல்பாடு மற்றும் தற்போதைய ஆராய்ச்சி நடவடிக்கைகள் குறித்து இயக்குநருக்கு விளக்கினார். மேலும்பயிர் உற்பத்தித்திறன், மண் வளம், கார்பன் சேமிப்பு. மண்ணின் உயிரியல் பண்புகள் மற்றும் மண் தரம் ஆகியவற்றில் ஊட்டச்சத்து மேலாண்மை முறைகளின் நீண்ட கால தாக்கங்களைப் புரிந்துகொள்வதில் PME மற்றும் LTFE ஆய்வுகளின் அறிவியல் முக்கியத்துவத்தையும் எடுத்துரைத்தார்.
முனைவர் ஜெயந்தி. பேராசிரியர் மற்றும் முனைவர்ஜி. ஸ்ரீதேவி உதவிப் பேராசிரியர் (மண்ணியல் மற்றும் வேளாண் வேதியியல் துறை) ஆகியோர் சமச்சீர் உரமிடுதலின் முக்கியத்துவத்தை விளக்கினர். ஒருங்கிணைந்த ஊட்டச்சத்து மேலாண்மை (INM) முறையானது. மண்ணின் சாதகமான இயற்பியல் பண்புகளைப் பராமரிப்பதோடு, மண்ணின் கரிம கார்பன் சேமிப்பு மற்றும் ஒட்டுமொத்த மண் தரத்தை மேம்படுத்தி, நிலையான பயிர் உற்பத்தித்திறனுக்குப் பங்களிக்கிறது என்பதை அவர்கள் சுட்டிக்காட்டினர்.
உரப் பயன்பாட்டைச் சீராக்குவதற்கு, மண் பரிசோதனை அடிப்படையிலான ‘இலக்கு விளைச்சல் அணுகுமுறை’யின் முக்கியத்துவத்தையும் அவர்கள் வலியுறுத்தினர். இந்த அணுகுமுறையானது மக்காச்சோளப் பயிருக்குத் தேவைப்படும் பொட்டாசியம் அளவை சுமார் 40 சதவீதமும், சூரியகாந்திப் பயிருக்குத் தேவைப்படும் பாஸ்பரஸ் மற்றும் பொட்டாசியம் அளவுகளை 40 சதவீதத்திற்கும் அதிகமாகவும் குறைக்கும் திறன் கொண்டது.
இதன் மூலம் சாகுபடிச் செலவைக் குறைக்க உதவுகிறது. இவ்வாய்வுடன் தொடர்புடைய ஆராய்ச்சி உதவியாளர் முனைவர் கோகிலா மற்றும் ஆய்வகத் தொழில்நுட்ப வல்லுநர் ராஜேஷ் குமார் ஆகியோரும் இப்பார்வையின்போது உடனிருந்தனர். இயற்கை வள மேலாண்மை இயக்குநரகத்தின் பேராசிரியர் முனைவர். தவமணி இத்தொழில்நுட்ப நிகழ்ச்சியை ஒருங்கிணைத்தார்.
இயற்கை வள மேலாண்மை இயக்குநரகத்தின் இயக்குநர் முனைவர். கார்த்திகேயன். தீவிர வேளாண்மை முறைகளில் பயிர் உற்பத்தித் திறனை நிலைநிறுத்துவதற்கும், மண் ஆரோக்கியத்தைப் பேணுவதற்கும் மற்றும் மண் தரத்தை மேம்படுத்துவதற்கும் ஒருங்கிணைந்த ஊட்டச்சத்து மேலாண்மை. சமச்சீர் உரமிடுதல் மற்றும் மண் பரிசோதனை அடிப்படையிலான உரப் பரிந்துரைகள் ஆகியவற்றின் முக்கியத்துவத்தை வலியுறுத்தினார்.
மேலும், விவசாயிகளுக்கு ஏற்ற நிலையான ஊட்டச்சத்து மேலாண்மை நடைமுறைகளை உருவாக்குவதற்கும் ஊக்குவிப்பதற்கும் தேவையான அறிவியல் பூர்வமான சான்றுகளைப் பெறுவதில், PME/LTFE போன்ற நீண்டகாலக் கள ஆய்வுகளின் முக்கியத்துவத்தையும் அவர் எடுத்துரைத்தார்.
