கோவை: கோவை குனியமுத்தூர் சாலையில் நேற்று ஏற்பட்ட விபத்தில் சிகிச்சை பெற்று வந்த ஒருவர் உயிரிழந்தார்.
கோவையில் அரசு பேருந்து ஓட்டுநருக்கு திடீரென வலிப்பு ஏற்பட்டதால் கட்டுப்பாட்டை இழந்த பேருந்து, சாலையோரம் இருந்த வாகனங்கள் மீது மோதிய விபத்தில் ஏற்கனவே இருவருக்கும் உயிரிழந்த நிலையில் கூடுதலாக ஒருவர் உயிரிழந்தார்.
கோவை குனியமுத்தூர் சாலை சுண்ணாம்பு கால்வாய் பகுதியில் நேற்று 66-ஆம் எண் கொண்ட அரசு பேருந்தை மார்ட்டின் என்ற ஓட்டுநர் ஓட்டிச் சென்ற போது அவருக்கு திடீரென வலிப்பு ஏற்பட்டதாக கூறப்படுகிறது.
அதனால் கட்டுப்பாட்டை இழந்த பேருந்து, சாலையோரம் நிறுத்தப்பட்டிருந்த வாகனங்கள் மீது மோதியது. இதனால் அப்பகுதியில் பெரும் பரபரப்பு ஏற்பட்டது.
இந்த விபத்தில் ஆட்டோ ஓட்டுநர் நூர்முகமது சம்பவ இடத்திலேயே உயிரிழந்தார். மேலும், அப்பாஸ் என்பவர் படுகாயமடைந்தார். பெண் ஒருவரும் காயமடைந்தார். தகவலறிந்து சம்பவ இடத்திற்கு வந்த காவல்துறையினர், காயமடைந்தவர்களையும் பேருந்து ஓட்டுநர் மார்ட்டினையும் மீட்டு மருத்துவமனைக்குக் கொண்டு சென்றனர். அப்போது மருத்துவமனைக்குச் செல்லும் வழியில் ஓட்டுநர் மார்ட்டினும் உயிரிழந்தார்.
இதையடுத்து, காயமடைந்த இருவரும் கோவை அரசு மருத்துவமனையில் அனுமதிக்கப்பட்டு சிகிச்சை பெற்று வந்தனர். இதில், தீவிர சிகிச்சைப் பிரிவில் அனுமதிக்கப்பட்டிருந்த அப்பாஸ், சிகிச்சை பலனின்றி இன்று உயிரிழந்தார்.
இந்த விபத்தில் இதுவரை ஆட்டோ ஓட்டுநர் நூர்முகமது, அரசு பேருந்து ஓட்டுநர் மார்ட்டின், அப்பாஸ் என மொத்தம் மூன்று பேர் உயிரிழந்துள்ளனர். இந்தச் சம்பவம் குறித்து கரும்புக்கடை காவல்துறையினர் வழக்குப் பதிவு செய்து விசாரணை மேற்கொண்டு வருகின்றனர்.
