கோவை : ஊழியர் வருங்கால வைப்பு நிதி நிறுவனமான EPFO-வில் கட்டாய உறுப்பினர் சேர்க்கைக்கான மாத ஊதிய உச்சவரம்பு ரூ.15,000-ல் இருந்து ரூ.25,000 ஆக உயர்த்தப்பட்டுள்ளது. இந்த புதிய மாற்றம் செப். 17-ம் தேதி முதல் அமலுக்கு வந்துள்ளது.
பிரதமர் நரேந்திர மோடி தலைமையில் கடந்த செப். 16-ம் தேதி நடைபெற்ற மத்திய அமைச்சரவைக் கூட்டத்தில், தொழிலாளர் மற்றும் வேலைவாய்ப்பு அமைச்சகம் முன்வைத்த இந்தத் திட்டத்திற்கு ஒப்புதல் அளிக்கப்பட்டது.
இதன் மூலம் நாடு முழுவதும் 51 லட்சத்திற்கும் அதிகமான கூடுதல் ஊழியர்கள் கட்டாய EPFO உறுப்பினர் வரம்புக்குள் கொண்டு வரப்படுவார்கள் என தெரிவிக்கப்பட்டுள்ளது.
முன்னதாக, கடந்த 2014-ம் ஆண்டு செப்டம்பர் மாதம் EPFO-வின் ஊதிய உச்சவரம்பு ரூ.6,500-ல் இருந்து ரூ.15,000 ஆக உயர்த்தப்பட்டது. தற்போது சுமார் 11 ஆண்டுகளுக்குப் பிறகு ஊதிய உச்சவரம்பு மீண்டும் உயர்த்தப்பட்டுள்ளது.
அதிகரித்து வரும் ஊதியங்கள், முறையான வேலைவாய்ப்புகளின் விரிவாக்கம் மற்றும் பல்வேறு மாநிலங்களில் உயர்ந்து வரும் குறைந்தபட்ச ஊதியங்களை கருத்தில் கொண்டு இந்த மாற்றம் மேற்கொள்ளப்பட்டுள்ளதாக தெரிவிக்கப்பட்டுள்ளது.
கோவை மண்டல EPFO அலுவலகத்தின் நிர்வாக வரம்பில் தமிழ்நாட்டின் 30 மாவட்டங்கள் உள்ளன. இந்த அலுவலகத்தின் கீழ் சுமார் 46,097 நிறுவனங்களில் பணிபுரியும் 33.54 லட்சம் உறுப்பினர்கள் உள்ளனர்.
மேலும், ஊழியர் ஓய்வூதியத் திட்டமான EPS-ன் கீழ் சுமார் 5.52 லட்சம் ஓய்வூதியதாரர்களுக்கு ஓய்வூதியப் பயன்கள் வழங்கப்பட்டு வருகின்றன.
ஊதிய உச்சவரம்பு உயர்த்தப்பட்டுள்ளதன் மூலம், அதிக எண்ணிக்கையிலான ஊழியர்கள் EPFO-வின் சட்டப்பூர்வ சமூகப் பாதுகாப்புத் திட்டங்களின் கீழ் கொண்டு வரப்படுவார்கள். இதன் மூலம் தொழிலாளர்களுக்கான சமூகப் பாதுகாப்பு மேலும் விரிவடையும் என தெரிவிக்கப்பட்டுள்ளது.
