கோவை : உலகம் முழுவதும் அக்டோபர் மாதம் மார்பகப் புற்றுநோய் விழிப்புணர்வு மாதமாக கடைபிடிக்கப்படுகிறது. இதையொட்டி, மார்பகப் புற்றுநோயை ஆரம்ப நிலையிலேயே கண்டறிதல் மற்றும் நவீன சிகிச்சை முறைகள் குறித்து பொதுமக்களிடையே விழிப்புணர்வு ஏற்படுத்தும் வகையில், கோவை கங்கா மருத்துவமனையில் விழிப்புணர்வு கண்காட்சி தொடங்கப்பட்டுள்ளது.
கங்கா மருத்துவமனையின் ‘பி’ பிளாக் தரைத்தளத்தில் அமைக்கப்பட்டுள்ள இந்தக் கண்காட்சி அக்டோபர் மாதம் முழுவதும் பொதுமக்களின் பார்வைக்காக திறந்திருக்கும். கண்காட்சியை மருத்துவமனையின் தலைவர் கனகவல்லி சண்முகநாதன் தொடங்கி வைத்தார்.
மார்பகப் புற்றுநோயின் அறிகுறிகள், பெண்கள் சுயமாக மார்பகப் பரிசோதனை செய்து கொள்ளும் முறை, நோயை ஆரம்ப நிலையிலேயே கண்டறிய உதவும் மேமோகிராபி பரிசோதனையின் முக்கியத்துவம் உள்ளிட்ட பல்வேறு தகவல்கள் கண்காட்சியில் இடம்பெற்றுள்ளன.
மேலும், கீமோதெரபி சிகிச்சை குறித்த அச்சங்கள் மற்றும் புற்றுநோய் சிகிச்சை தொடர்பாக பொதுமக்களிடையே நிலவும் தவறான கருத்துகளை போக்கும் வகையிலும் கண்காட்சி அமைக்கப்பட்டுள்ளது.
மார்பகப் புற்றுநோய் அறுவை சிகிச்சையில் ஏற்பட்டுள்ள சமீபத்திய முன்னேற்றங்களும் கண்காட்சியில் முக்கியமாக இடம்பெற்றுள்ளன. குறிப்பாக, புற்றுநோய் அறுவை சிகிச்சைக்குப் பிறகு மார்பகத்தை மறுசீரமைக்கும் நவீன முறைகள் குறித்து விளக்கப்பட்டுள்ளது.
புற்றுநோய் அறுவை சிகிச்சை நிபுணர் மற்றும் மார்பக அறுவை சிகிச்சையில் பயிற்சி பெற்ற பிளாஸ்டிக் சர்ஜன் ஆகியோர் இணைந்து செயல்படுவதன் மூலம், புற்றுநோய்க்கு சிகிச்சை அளிப்பதுடன், அறுவை சிகிச்சைக்கு முன்பு இருந்ததைப் போன்ற மார்பகத்தின் வடிவத்தையும் அளவையும் முடிந்தவரை பாதுகாக்க முடியும் என்பது குறித்தும் கண்காட்சியில் தெரிவிக்கப்பட்டுள்ளது.
புற்றுநோய் அறுவை சிகிச்சைக்குப் பிறகு மார்பகத்தை மறுசீரமைப்பதன் மூலம் பெண்கள் தங்களது தன்னம்பிக்கையையும் உடல் தோற்றத்தையும் மீண்டும் பெறுவதற்கான வாய்ப்புகள் குறித்தும் விளக்கப்பட்டுள்ளது.
அதேபோல், மார்பகப் புற்றுநோய் சிகிச்சைக்குப் பிறகு கைகளில் ஏற்படக்கூடிய ‘லிம்பிடீமா’ எனப்படும் நிணநீர் வீக்கம் குறித்தும் விழிப்புணர்வு ஏற்படுத்தப்படுகிறது. இந்த வீக்கம் ஏற்படுவதற்கான காரணங்கள், அதனை தடுக்கும் வழிமுறைகள் மற்றும் பாதிக்கப்பட்ட பெண்களுக்கான நவீன சிகிச்சை முறைகள் குறித்தும் கண்காட்சியில் விளக்கப்படுகின்றன.
இதுகுறித்து கங்கா மருத்துவமனையின் ஆன்கோபிளாஸ்டிக் மார்பக அறுவை சிகிச்சை நிபுணர் டாக்டர் ராஜா சண்முக கிருஷ்ணன் செய்தியாளர்களிடம் கூறுகையில், மார்பகப் புற்றுநோயை ஆரம்ப நிலையிலேயே கண்டறிந்து உரிய நேரத்தில் சிகிச்சை அளிப்பதன் மூலம் சிறந்த சிகிச்சை பலன்களை பெற முடியும் என்றார். இதன் மூலம் பெண்கள் தங்களது இயல்பான வாழ்க்கையை தொடர்ந்து மேற்கொள்ள முடியும் என்றும் தெரிவித்தார்.
மேலும் அவர் கூறுகையில், நவீன மார்பகப் புற்றுநோய் சிகிச்சை என்பது புற்றுநோயை குணப்படுத்துவதோடு மட்டும் நின்றுவிடுவதில்லை. சரியான சிகிச்சையின் மூலம் பெண்கள் தங்களது தன்னம்பிக்கையை மீட்டெடுத்து, மீண்டும் பணிக்குச் செல்வதுடன், புற்றுநோய்க்குப் பிந்தைய இயல்பான வாழ்க்கையையும் தொடர முடியும் என்றார்.
பெண்களிடையே மார்பகப் புற்றுநோய் குறித்த விழிப்புணர்வை ஏற்படுத்துதல், சிகிச்சை குறித்த அச்சத்தை போக்குதல் மற்றும் சரியான நேரத்தில் பரிசோதனை செய்து உரிய சிகிச்சை பெறுவதை ஊக்குவித்தல் ஆகியவற்றை முக்கிய நோக்கமாகக் கொண்டு இந்தக் கண்காட்சி ஏற்பாடு செய்யப்பட்டுள்ளது.
