கோவை : போலி ஆர்டிஓ சலான் அனுப்பி, தனியார் நிறுவன ஊழியரின் வங்கிக் கணக்கில் இருந்து ரூ.1.46 லட்சம் மோசடி செய்யப்பட்ட சம்பவம் குறித்து கோவை மாவட்ட சைபர் கிரைம் போலீசார் விசாரணை நடத்தி வருகின்றனர்.
கோவை பொள்ளாச்சி, கோயில்பாளையம் பகுதியைச் சேர்ந்த 45 வயது நபர் ஒருவர் தனியார் நிறுவனத்தில் பணியாற்றி வருகிறார். கடந்த மாதம் 19-ம் தேதி அவரது வாட்ஸ்அப் எண்ணுக்கு ஆர்டிஓ சலான் போன்று ஒரு மெசேஜ் வந்துள்ளது.
அந்த மெசேஜை திறந்து பார்த்தபோது, அதில் அவரது தனிப்பட்ட விவரங்களை பதிவு செய்யுமாறு கேட்கப்பட்டிருந்ததாக கூறப்படுகிறது. இதனை நம்பிய அவர், அதில் கேட்கப்பட்ட விவரங்களை பதிவு செய்துள்ளார்.
இதன் பின்னர் அவரது வங்கிக் கணக்கில் இருந்து அடுத்தடுத்து பல்வேறு பரிவர்த்தனைகள் மூலம் ரூ.1 லட்சத்து 46 ஆயிரத்து 400 எடுக்கப்பட்டுள்ளது. இதனை கண்டு அதிர்ச்சியடைந்த அவர், வங்கியை தொடர்பு கொண்டு விசாரித்துள்ளார்.
அப்போதுதான் வாட்ஸ்அப்பில் வந்த ஆர்டிஓ சலான் மெசேஜ் போலியானது என்பதும், அதன் மூலம் தனது வங்கி கணக்கு விவரங்களை பயன்படுத்தி பணம் மோசடி செய்யப்பட்டிருப்பதும் தெரியவந்ததாக கூறப்படுகிறது.
இதையடுத்து அவர் கோவை மாவட்ட சைபர் கிரைம் போலீசில் புகார் அளித்தார். புகாரின் பேரில் போலீசார் வழக்குப்பதிவு செய்து, போலி சலான் மெசேஜ் அனுப்பி பணத்தை மோசடி செய்த மர்ம நபர்கள் குறித்து விசாரணை நடத்தி வருகின்றனர்.
