கோவை : கடன் வாங்கி ஒரு வாரத்தில் நகையை மீட்டுத் தருவதாகக் கூறி, 6 பவுன் தங்க நகையைப் பெற்றுக்கொண்டு திருப்பித் தராமல் மோசடி செய்ததாக பெண் ஒருவர் மீது போலீசார் வழக்குப்பதிவு செய்து விசாரணை நடத்தி வருகின்றனர்.
கோவை இருகூர் ஏ.ஜி. புதூர் பகுதியைச் சேர்ந்தவர் மயில்சாமி. இவரது மனைவி விஜயா (33). அதே பகுதியைச் சேர்ந்தவர் கோகிலாமணி. இவர், தனக்குப் பணம் தேவைப்படுவதாக விஜயாவிடம் தெரிவித்துள்ளார்.
மேலும், அவரிடம் தங்க நகைகளைப் பெற்றுக்கொண்டு கூட்டுறவு வங்கியில் அடமானம் வைத்து கடன் வாங்குவதாகவும், ஒரு வாரத்திற்குள் பணத்தை ஏற்பாடு செய்து நகைகளை மீட்டுத் திருப்பிக் கொடுப்பதாகவும் கூறியுள்ளார்.
இதை நம்பிய விஜயா, கடந்த ஆண்டு நவம்பர் மாதம் தனது 6 பவுன் தங்க நகைகளை கோகிலாமணியிடம் கொடுத்துள்ளார்.
ஆனால், நகைகளைப் பெற்றுக்கொண்ட கோகிலாமணி, பல மாதங்கள் கடந்தும் அவற்றை மீட்டுத் திருப்பிக் கொடுக்காமல் காலம் தாழ்த்தி வந்ததாகக் கூறப்படுகிறது.
இதனால் அதிர்ச்சியடைந்த விஜயா, இதுகுறித்து சிங்காநல்லூர் போலீசில் புகார் அளித்தார். புகாரின் பேரில் போலீசார், கோகிலாமணி மீது வழக்குப்பதிவு செய்து விசாரணை நடத்தி வருகின்றனர்.
