கோவை: தமிழகத்தில் எங்கு வாங்கிய காலி மதுபாட்டில்களையும், எந்தப் பகுதியிலும் திரும்ப ஒப்படைக்கும் திட்டம் இன்னும் 20 நாட்களில் அமலுக்கு வரும் என அமைச்சர் விக்னேஷ் தெரிவித்துள்ளார். இதற்காக 40,048 இயந்திரங்கள் வாங்கத் திட்டமிடப்பட்டுள்ளதாகவும் அவர் கூறினார்.
கோவை குறிச்சி பகுதியில் செய்தியாளர்களைச் சந்தித்த அமைச்சர் விக்னேஷ், காலி மதுபாட்டில்களைத் திரும்பப் பெறும் நடைமுறை, டாஸ்மாக் ஊழியர்களின் போராட்டம் மற்றும் துறையில் மேற்கொள்ளப்பட உள்ள மாற்றங்கள் குறித்து விளக்கினார்.
கடந்த ஆறு மாதங்களில் ஐந்து முறை டாஸ்மாக் ஊழியர்கள் போராட்டத்தில் ஈடுபட்டுள்ளதாகத் தெரிவித்த அவர், கடந்த கால ஆட்சியாளர்களின் நடவடிக்கைகளே தற்போதைய பிரச்சினைகளுக்குக் காரணம் எனக் குற்றம்சாட்டினார். ஊழியர்களிடம் பணம் வசூலிக்க வேண்டும் எனக் கடந்த காலத்தில் அறிவுறுத்தப்பட்டதாகவும் அவர் கூறினார்.
காலி மதுபாட்டில்களை முறையாகக் கையாண்டதாக நீதிமன்றத்தில் அறிக்கை தாக்கல் செய்யப்பட்டுள்ள நிலையில், எதிர்பார்த்த அளவுக்குப் பாட்டில்கள் திரும்ப வரவில்லை என அமைச்சர் தெரிவித்தார். பாட்டில்கள் கணக்கில் வரவு வைக்கப்பட்டாலும், அதற்கான பணம் வரவில்லை என்றும், இதுகுறித்தே அரசு கேள்வி எழுப்புவதாகவும் கூறினார். முன்னாள் அமைச்சர் செந்தில் பாலாஜியை விமர்சித்த அவர், கடந்த காலத்தில் அந்தப் பணம் அவரது வீட்டிற்குச் சென்றிருக்கும் எனவும் குற்றம்சாட்டினார்.
தமிழகத்தில் மிகப்பெரிய ஊழல் காலி மதுபாட்டில்கள் விவகாரத்தில்தான் நடைபெறுவதாகக் குற்றம்சாட்டிய அமைச்சர், பாட்டில்களைத் திரும்பப் பெறும் முறையை வெளிப்படையாகச் செயல்படுத்த அரசு திட்டமிட்டுள்ளதாகத் தெரிவித்தார்.
அதன்படி, தமிழகத்தின் எந்த இடத்தில் மதுபாட்டில்களை வாங்கியிருந்தாலும், அவற்றை மாநிலத்தின் வேறு எந்தப் பகுதியிலும் திரும்ப ஒப்படைக்கும் வசதி இன்னும் 20 நாட்களில் அமல்படுத்தப்படும் என்றார். இந்தத் திட்டத்திற்காக 40,048 இயந்திரங்கள் வாங்க நடவடிக்கை எடுக்கப்படுவதாகவும் கூறினார்.
டாஸ்மாக் ஊழியர்களுக்கு ரூ.34 ஆயிரம் சம்பளம், வார விடுமுறை, மருத்துவக் காப்பீடு மற்றும் பண்டிகைக் காலங்களில் ரூ.20 ஆயிரம் சலுகை உள்ளிட்ட நலத்திட்டங்களை வழங்க அரசு நடவடிக்கை எடுத்து வருவதாக அமைச்சர் தெரிவித்தார். கடைகளில் பணிபுரியும் ஊழியர்கள் மட்டும் சீருடை அணிய அறிவுறுத்தப்பட்டுள்ளதாகவும் கூறினார்.
டாஸ்மாக் துறையில் நிலவும் பிரச்சினைகளால் தானும் சில நாட்கள் தூக்கமின்றி இருந்ததாகக் குறிப்பிட்ட அவர், மதுபாட்டில்களில் அதிகபட்ச சில்லறை விலையான எம்.ஆர்.பி. கட்டாயம் இடம்பெற வேண்டும் என்றார். மதுபானங்களின் தரத்தை ஆய்வு செய்யவும் அதிகாரிகளுக்கு அறிவுறுத்தப்பட்டுள்ளதாகத் தெரிவித்தார்.
டாஸ்மாக் ஊழியர்கள் போராட்டத்தில் ஈடுபடக் கூடாது என்றும், மீறினால் சட்டப்படி கடுமையான நடவடிக்கை எடுக்கப்படும் என்றும் அமைச்சர் எச்சரித்தார். இதுவரை 960 பேருக்கு நோட்டீஸ் வழங்கப்பட்டுள்ளதாகவும், கடைகளை மூடச் சொன்ன நான்கு பேர் பணியிடை நீக்கம் செய்யப்பட்டுள்ளதாகவும் கூறினார். கடைகளை மூடிய ஊழியர்கள் மீது நடவடிக்கை எடுப்பது தொடர்பாக விசாரணை நடைபெற்று வருவதாகவும் தெரிவித்தார்.
கடந்த மாதம் 60 சதவீத அளவுக்குக் காலி பாட்டில்களைத் திரும்பப் பெற்றவர்கள், தற்போது அவற்றை வாங்க மறுப்பது ஏன் எனவும் அவர் கேள்வி எழுப்பினார். டாஸ்மாக் கடைகளுக்குக் கூடுதலாக ரூ.60 ஆயிரம் வழங்கப்படுவதுடன், காலி மதுபாட்டில்களை வாங்குவதற்காகத் தனியாகக் கூடுதல் தொகையும் வழங்கப்பட்டு வருவதாகக் கூறினார்.
கடைகளில் கூடுதல் பணியாளர்கள் நியமிக்கப்படுவார்கள் என்றும், 500 முதல் 1,000 சதுர அடி பரப்பளவில் கடைகளை அமைப்பது குறித்து நடவடிக்கை எடுக்கப்பட்டு வருவதாகவும் அமைச்சர் தெரிவித்தார். மாற்றுப் பணியாளர்களை நியமித்துக் கடைகளைத் திறக்கவும் அரசு முடிவு செய்துள்ளதாகக் கூறினார்.
டாஸ்மாக் கடைகளில் முறைகேடுகள் நடைபெற்றால், சம்பந்தப்பட்ட கடையின் பெயரைக் குறிப்பிட்டுப் புகார் அளிக்க வேண்டும் எனத் தெரிவித்த அவர், புகார்கள் மீது கடுமையான நடவடிக்கை எடுக்கப்படும் என்றார். தனியார் பார்கள் குறித்த பட்டியல் விரைவில் தயாரிக்கப்படும் என்றும், பார் உரிமம் பெற்றவர்கள் அவற்றை உள்வாடகைக்கு விட முடியாது என்றும் கூறினார்.
டாஸ்மாக் கடைகளை இடமாற்றம் செய்வது தொடர்பாக ஆலோசனை நடைபெற்று வருவதாகவும் அமைச்சர் தெரிவித்தார். முன்னாள் முதலமைச்சர் ஜெயலலிதா எடுத்த முடிவுகளைப் போன்ற சூழ்நிலைகள் உருவானால், டாஸ்மாக் நிர்வாகத்தைத் தனியாரிடம் ஒப்படைப்பது குறித்தும் பரிசீலிக்க முடியும் எனக் கூறினார்.
தீபாவளிப் பண்டிகையை முன்னிட்டு டாஸ்மாக் விற்பனைக்கு எந்த இலக்கும் நிர்ணயிக்கப்படவில்லை எனத் தெரிவித்த அமைச்சர் விக்னேஷ், நேற்று பலர் மது அருந்தாமல் இருந்தது தனக்கு மிகுந்த மகிழ்ச்சியை அளித்ததாகவும் கூறினார்.
