கோவை : கோவை காந்திபுரம் பகுதியில் சுகாதாரமற்ற நிலையில் பராமரிக்கப்பட்டு வந்த மாடு அறுவை மனைக்கு மாநகராட்சி சுகாதாரத்துறையினர் ரூ.10 ஆயிரம் அபராதம் விதித்தனர்.
கோவை மாநகராட்சி சார்பில் டெங்கு தடுப்பு நடவடிக்கைகள் தொடர்ந்து மேற்கொள்ளப்பட்டு வருகின்றன. இதன் ஒரு பகுதியாக சுகாதாரத்துறை அதிகாரிகள் குடியிருப்புகள், தொழிற்சாலைகள், வணிக நிறுவனங்கள் உள்ளிட்ட பல்வேறு இடங்களில் நேரில் ஆய்வு செய்து வருகின்றனர்.
குறிப்பாக, சுகாதார சீர்கேடு ஏற்படும் வகையில் இடங்களை பராமரிப்பது, கொசு உற்பத்திக்கு வழிவகுக்கும் வகையில் தண்ணீர் தேங்க விடுவது உள்ளிட்ட விதிமீறல்கள் கண்டறியப்பட்டால் சம்பந்தப்பட்டவர்களுக்கு அபராதம் விதிக்கப்பட்டு வருகிறது.
இதன்படி, காந்திபுரம் ஆம்னி பேருந்து நிலையம் அருகே உள்ள மாடு அறுவை மனையில் மாநகராட்சி சுகாதாரக்குழுவினர் நேற்று ஆய்வு நடத்தினர். அப்போது அந்த வளாகம் சுகாதாரமற்ற முறையில் பராமரிக்கப்பட்டு வந்தது தெரியவந்தது.
இதையடுத்து, சம்பந்தப்பட்ட நபருக்கு ரூ.10 ஆயிரம் அபராதம் விதித்த சுகாதாரத்துறை அதிகாரிகள், தொடர்ந்து சுகாதார விதிமுறைகளை முறையாக பின்பற்ற வேண்டும் என அறிவுறுத்தினர்.
