கோவை : கோவையில் குட்கா கடத்தலைத் தடுக்க தப்பியோடிய காரின் மேற்கூரையில் 40 கி.மீ. பயணித்த தலைமைக் காவலர் வேல்முருகனை முதலமைச்சர் நேரில் அழைத்துப் பாராட்டினார்.
கோவையில் குட்கா கடத்தலைத் தடுக்க போலீசார் மேற்கொண்ட நடவடிக்கையின்போது, தப்பிச் சென்ற காரின் மேற்கூரையில் சுமார் 40 கி.மீ. பயணித்த தலைமைக் காவலர் வேல்முருகனின் துணிச்சலான செயல் கவனம் பெற்றுள்ளது.
அவரது நடவடிக்கையைப் பாராட்டும் வகையில் முதலமைச்சர் அவரை நேரில் அழைத்துப் பாராட்டியுள்ளார்.
கோவில்பாளையம் காவல் நிலையத்தில் தலைமைக் காவலராக பணியாற்றி வரும் வேல்முருகன், கடந்த செப். 27-ம் தேதி குட்கா பொருட்கள் கடத்தப்படுவதாக கிடைத்த தகவலின் அடிப்படையில் போலீசாருடன் வாகன சோதனையில் ஈடுபட்டிருந்தார். அப்போது சந்தேகத்திற்கிடமான கார் ஒன்றை போலீசார் நிறுத்த முயன்றுள்ளனர்.
போலீசாரிடம் சிக்காமல் தப்பிக்க முயன்றவர்கள் காரை வேகமாக இயக்கியுள்ளனர். இதையடுத்து தலைமைக் காவலர் வேல்முருகன் அந்த காரை விடாமல் பின்தொடர்ந்ததுடன், காரின் மேற்கூரையில் ஏறியுள்ளார். கார் வேகமாக சென்ற நிலையிலும் மேற்கூரையைப் பிடித்தபடி சுமார் 40 கி.மீ. பயணித்ததாக தெரிவிக்கப்பட்டுள்ளது.
தொடர்ந்து போலீசார் மேற்கொண்ட ஒருங்கிணைந்த நடவடிக்கையில் அவிநாசி அருகே அந்த கார் தடுத்து நிறுத்தப்பட்டது. காரில் இருந்த 3 பேர் கைது செய்யப்பட்டனர். அவர்களிடம் இருந்து 233 கிலோ குட்கா பொருட்கள் பறிமுதல் செய்யப்பட்டதுடன், கடத்தலுக்கு பயன்படுத்தப்பட்ட காரும் பறிமுதல் செய்யப்பட்டது.
இந்த நடவடிக்கையில் தலைமைக் காவலர் வேல்முருகன் செயல்பட்ட விதம் குறித்து காவல்துறை உயர் அதிகாரிகளிடம் தெரிவிக்கப்பட்டது.
அவரது துணிச்சல் மற்றும் கடமை உணர்வைப் பாராட்டும் வகையில் முதலமைச்சர் அவரை நேரில் அழைத்துப் பாராட்டியுள்ளார். மேலும், தமிழ்நாடு காவல்துறை இயக்குநரும் வேல்முருகனை நேரில் சந்தித்து பாராட்டியதாக தெரிவிக்கப்பட்டுள்ளது.
