கோவை : சபரிமலை ஐயப்பன் கோவில் சீசனை முன்னிட்டு, பக்தர்களின் வசதிக்காக சென்னை – கொல்லம் இடையே கோவை போத்தனூர் வழியாக வாராந்திர சிறப்பு ரயில்கள் இயக்கப்படும் என தெற்கு ரயில்வே அறிவித்துள்ளது. சென்னையிலிருந்து கொல்லம் செல்லும் ரயில் எழும்பூரில் புறப்படும். மறுமார்க்கத்தில் கொல்லத்திலிருந்து புறப்படும் ரயில் சென்னை சென்ட்ரல் வந்தடையும்.
சபரிமலை ஐயப்பன் கோவிலுக்கு மாலை அணிந்து விரதம் இருக்கும் பக்தர்கள், தமிழ்நாட்டின் பல்வேறு பகுதிகளில் இருந்து கேரளாவுக்குப் பயணம் மேற்கொண்டு வருகின்றனர். சீசனில் ரயில்களில் பயணிகள் கூட்டம் அதிகரிக்கும் என்பதால், ஜோலார்பேட்டை, சேலம், ஈரோடு, திருப்பூர், போத்தனூர் வழியாக இந்த வாராந்திர சிறப்பு ரயில்களை இயக்க ரயில்வே நிர்வாகம் ஏற்பாடு செய்துள்ளது. இரு திசைகளிலும் தலா 10 சேவைகள் இயக்கப்பட உள்ளன.
சென்னை எழும்பூர் – கொல்லம் சிறப்பு ரயில் (06121)
சென்னை எழும்பூரிலிருந்து கொல்லம் செல்லும் சிறப்பு ரயில் (06121), நவம்பர் 21 முதல் 2027 ஜனவரி 23 வரை சனிக்கிழமைகளில் இயக்கப்படும். சனிக்கிழமை இரவு 11.40 மணிக்கு சென்னை எழும்பூரில் புறப்படும் இந்த ரயில், மறுநாள் ஞாயிற்றுக்கிழமை மாலை 4.30 மணிக்குக் கொல்லம் சென்றடையும்.
ஞாயிற்றுக்கிழமை அதிகாலை 3.15 மணிக்கு ஜோலார்பேட்டை வந்தடையும் ரயில், 3.20 மணிக்குப் புறப்படும். அதிகாலை 5 மணிக்குச் சேலம் வந்து 5.03 மணிக்கும், காலை 6.05 மணிக்கு ஈரோடு வந்து 6.15 மணிக்கும் புறப்படும். காலை 6.58 மணிக்குத் திருப்பூர் வந்தடைந்து 7 மணிக்குப் புறப்படும் ரயில், கோவை போத்தனூருக்குக் காலை 8.23 மணிக்கு வந்து 8.25 மணிக்குக் கொல்லம் நோக்கிப் புறப்படும்.
கொல்லம் – சென்னை சென்ட்ரல் சிறப்பு ரயில் (06122)
மறுமார்க்கத்தில் கொல்லத்திலிருந்து சென்னை சென்ட்ரல் செல்லும் சிறப்பு ரயில் (06122), நவம்பர் 22 முதல் 2027 ஜனவரி 24 வரை ஞாயிற்றுக்கிழமைகளில் இயக்கப்படும். ஞாயிற்றுக்கிழமை மாலை 6.45 மணிக்குக் கொல்லத்தில் புறப்படும் இந்த ரயில், மறுநாள் திங்கட்கிழமை காலை 11.40 மணிக்குச் சென்னை சென்ட்ரல் வந்தடையும்.
திங்கட்கிழமை அதிகாலை 2.18 மணிக்குக் கோவை போத்தனூர் வந்தடையும் ரயில், 2.20 மணிக்குப் புறப்படும். தொடர்ந்து அதிகாலை 3 மணிக்குத் திருப்பூர் வந்து 3.02 மணிக்கும், அதிகாலை 3.55 மணிக்கு ஈரோடு வந்து 4.05 மணிக்கும் புறப்படும். அதிகாலை 4.57 மணிக்குச் சேலம் வந்து 5 மணிக்கும், காலை 7.10 மணிக்கு ஜோலார்பேட்டை வந்து 7.15 மணிக்கும் சென்னை நோக்கிப் புறப்படும்.
ரயில்கள் நிற்கும் நிலையங்கள்
இந்தச் சிறப்பு ரயில்கள் பெரம்பூர், திருவள்ளூர், அரக்கோணம், காட்பாடி, ஜோலார்பேட்டை, சேலம், ஈரோடு, திருப்பூர், போத்தனூர், பாலக்காடு, திருச்சூர், ஆலுவா, எர்ணாகுளம் டவுன், கோட்டயம், சங்கனாச்சேரி, திருவல்லா, செங்கன்னூர், மாவேலிக்கரா மற்றும் காயங்குளம் ஆகிய நிலையங்களில் நின்று செல்லும்.
இந்த ரயில்களில் முதல் வகுப்பு ஏசி, இரண்டடுக்கு ஏசி வசதிகள் இணைந்த பெட்டி, தனி இரண்டடுக்கு ஏசி பெட்டிகள், மூன்றடுக்கு ஏசி பெட்டிகள், படுக்கை வசதி கொண்ட பெட்டிகள் மற்றும் சரக்கு, பிரேக் வேன் பெட்டிகள் இணைக்கப்படும்.
கோவை மற்றும் சுற்றுவட்டாரப் பகுதிகளில் இருந்து சபரிமலைக்குச் செல்லும் பக்தர்கள், ஞாயிற்றுக்கிழமை காலை 8.25 மணிக்குப் போத்தனூரிலிருந்து கொல்லம் நோக்கிப் புறப்படும் ரயிலைப் பயன்படுத்திக் கொள்ளலாம். அதேபோல், கோவையிலிருந்து சென்னை செல்லும் பயணிகளுக்குத் திங்கட்கிழமை அதிகாலை 2.20 மணிக்குப் போத்தனூரிலிருந்து புறப்படும் மறுமார்க்கச் சிறப்பு ரயிலும் கூடுதல் பயண வாய்ப்பாக அமையும்.
சபரிமலை பக்தர்களுக்காக கோவை போத்தனூர் வழியாக சென்னை–கொல்லம் வாராந்திர சிறப்பு ரயில்கள் (06121, 06122) இயக்கப்படுகின்றன. கொல்லம் செல்லும் ரயில் ஞாயிறு காலை 8.25 மணிக்கும், சென்னை செல்லும் ரயில் திங்கள் அதிகாலை 2.20 மணிக்கும் போத்தனூரிலிருந்து புறப்படும்.


