Coimbatore Weather Forecast: கோவையில் அடுத்த 6 நாட்களுக்கு மழைக்கு வாய்ப்புள்ளதாக வானிலை மையம் தகவல் தெரிவித்துள்ளது.
கோவை மாவட்டத்தில் கோடை வெப்பம் வாட்டி வதைத்து வந்த நிலையில், கடந்த சில நாட்களாக அவ்வப்போது மழை பெய்வதால், வெப்பம் தணிந்து, காலை நேரங்களில் குளுகுளு சீதோசன நிலை நிலவு வருகிறது. இது கோவை மக்களை குஷிப்படுத்தியுள்ள அதே நேரத்தில், கடந்த ஒரு சில நாட்களாக பகல் நேரத்தில் வெப்பம் சற்று அதிகமாகவே காணப்படுகிறது.
இதனிடையே, இன்று முதல் அடுத்த 6 நாட்களுக்கு இடியுடன் கூடிய மிதமான முதல் கனமழை பெய்ய வாய்ப்பு இருப்பதாக இந்திய வானிலை ஆய்வு மையம் தெரிவித்துள்ளது.
கோவையில் கடந்த 24 மணி நேரத்தில் அதிகபட்சமாக 33 டிகிரி செல்சியஸ் வெப்பநிலையும், குறைந்தபட்சமாக 23 டிகிரி செல்சியஸ் வெப்பநிலையும் பதிவாகியுள்ளது.
இடியுடன் கூடிய…
வானிலை முன்னறிவிப்பின்படி, ஜூன் 5 முதல் ஜூன் 8 வரை கோவை மாவட்டத்தில் பகுதியளவு மேகமூட்டத்துடன் இடியுடன் கூடிய மிதமான முதல் கனமழை பெய்ய வாய்ப்பு உள்ளது. அதிகபட்ச வெப்பநிலை 32 முதல் 34 டிகிரி செல்சியஸ் வரையும், குறைந்தபட்ச வெப்பநிலை 22 முதல் 23 டிகிரி செல்சியஸ் வரையும் பதிவாகக்கூடும் என தெரிவிக்கப்பட்டுள்ளது.
ஜூன் 9 மற்றும் 10 ஆகிய தேதிகளில் பகுதியளவு மேகமூட்டத்துடன் லேசான முதல் மிதமான மழை பெய்ய வாய்ப்புள்ளதாகவும் வானிலை ஆய்வு மையம் தெரிவித்துள்ளது.
எனவே, பொதுமக்கள் மழைக்கால முன்னெச்சரிக்கை நடவடிக்கைகளை மேற்கொள்ளுமாறும், இடியுடன் கூடிய மழை நேரங்களில் பாதுகாப்பாக இருக்குமாறும் அறிவுறுத்தப்பட்டுள்ளது.
