கோவை : கோவை ஆனைமலையை சேர்ந்த பஞ்சாயத்து வளர்ச்சி அலுவலரின் செல்போனை ஹேக் செய்து, அவரது வங்கிக் கணக்கில் இருந்து ரூ.9.78 லட்சம் பணம் திருடப்பட்ட சம்பவம் அதிர்ச்சியை ஏற்படுத்தியுள்ளது. இதுகுறித்து கோவை மாவட்ட சைபர் கிரைம் போலீசார் விசாரணை நடத்தி வருகின்றனர்.
ஆனைமலையை சேர்ந்த 50 வயது நபர் ஒருவர் பஞ்சாயத்து வளர்ச்சி அலுவலராக பணியாற்றி வருகிறார். இவர் உடுமலையில் உள்ள ஒரு வங்கிக் கிளையில் கடந்த 2017-ம் ஆண்டு முதல் வங்கிக் கணக்கு வைத்து பராமரித்து வந்துள்ளார்.
இந்த நிலையில், கடந்த 7-ம் தேதி முதல் 14-ம் தேதி வரை அவரது செல்போனுக்கு வழக்கத்திற்கு மாறாக ஏராளமான குறுஞ்செய்திகள் வந்துள்ளன. தினமும் சுமார் 700-க்கும் மேற்பட்ட மெசேஜ்கள் வந்ததுடன், பல்வேறு வெளிமாநில செல்போன் எண்களில் இருந்தும் தொடர்ச்சியாக மிஸ்டு கால்கள் வந்துள்ளன.
தொடர்ந்து அவரது செல்போன் ஹேக் செய்யப்பட்டதாக கூறப்படுகிறது. இதையடுத்து அவரது வங்கிக் கணக்கில் இருந்து பல்வேறு தவணைகளாக மொத்தம் ரூ.9 லட்சத்து 78 ஆயிரம் பணம் மர்மமான முறையில் எடுக்கப்பட்டுள்ளது.
வங்கிக் கணக்கில் இருந்து பணம் திருடப்பட்டதை அறிந்த அவர் அதிர்ச்சி அடைந்தார். இதுகுறித்து கோவை மாவட்ட சைபர் கிரைம் போலீசில் புகார் அளித்தார்.
புகாரின் பேரில் போலீசார் வழக்குப்பதிவு செய்து விசாரணையை தொடங்கியுள்ளனர். செல்போனை ஹேக் செய்து வங்கிக் கணக்கில் இருந்து பணத்தை திருடிய மர்ம நபர்கள் யார் என்பது குறித்து தொழில்நுட்ப உதவியுடன் போலீசார் தீவிரமாக விசாரணை நடத்தி வருகின்றனர்.
