கோவை: கோவையில் மோடி கபடி கோப்பை 2026 போட்டியை பாஜக மாநிலத் தலைவர் நயினார் நாகேந்திரன் தொடங்கி வைத்தார்.
பிரதமர் நரேந்திர மோடியின் 76-வது பிறந்தநாளை முன்னிட்டு, கோவை மாவட்டம் துடியலூரில் பாரதிய ஜனதா கட்சியின் இளைஞரணி சார்பில் நடைபெற்ற மாபெரும் கபடிப் போட்டியை, பாஜக மாநிலத் தலைவர் நயினார் நாகேந்திரன் தொடங்கி வைத்தார்.
பிரதமர் நரேந்திர மோடியின் பிறந்தநாளை முன்னிட்டு, நாடு முழுவதும் ‘சேவா சங்கல்ப் அபியான்’ என்ற பெயரில் பல்வேறு நிகழ்ச்சிகள் நடைபெற்று வருகின்றன. இதன் ஒரு பகுதியாக, துடியலூரில் ‘மோடி கபடி கோப்பை 2026’ என்ற தலைப்பில் கபடிப் போட்டிகள் நடத்தப்பட்டன.
இப்போட்டியில் சிறப்பு விருந்தினராகக் கலந்து கொண்ட தமிழக பாஜக மாநிலத் தலைவர் நயினார் நாகேந்திரன், கபடி வீரர்களுடன் கைகுலுக்கி வாழ்த்து தெரிவித்தார். தொடர்ந்து, நாணயம் சுண்டிப் போட்டு போட்டிகளைத் தொடங்கி வைத்து, வீரர்களின் விளையாட்டுத் திறனைப் பார்வையிட்டார்.
இந்தப் போட்டியில் கோவை மற்றும் சுற்றுவட்டாரப் பகுதிகளைச் சேர்ந்த 56 கபடி அணிகள் பங்கேற்று விளையாடின.
போட்டியில் முதல் நான்கு இடங்களைப் பிடிக்கும் அணிகளுக்குப் பரிசுக் கோப்பைகளும் ரொக்கப் பரிசுகளும் வழங்கப்பட உள்ளன.
