எங்கள விட்ருங்க, உண்மை தெரியாம பேசாதீங்க… கோவை தவெக நிர்வாகி செயலால் பெண் கதறல்…!

கோவை: கோவையில் தவெக நிர்வாகி ஷோரூமில் அநாகரிகமாக நடந்து கொண்டதாகவும், கட்சிப் பதவிக்காகப் பணம் பெற்று ஏமாற்றியதாகவும் குற்றச்சாட்டு எழுந்துள்ளது. சமூக வலைதளங்களில் ஆபாசமாக விமர்சிப்பதாகப் பெண் உரிமையாளர் கண்ணீர் மல்க வேதனை தெரிவித்துள்ளார்.

கோவை மாவட்டம் கலிக்கநாயக்கன்பாளையம் பகுதியில் இருசக்கர வாகன ஷோரூம் நடத்தி வருபவர் மகாராஜன். இவரது மனைவி திவ்யா. சமீபத்தில் தமிழக வெற்றிக் கழகத்தில் இணைந்த மகாராஜன், அக்கட்சியின் பல்வேறு நிகழ்ச்சிகள் மற்றும் கட்சிப் பணிகளில் ஆர்வத்துடன் ஈடுபட்டு வந்துள்ளார்.

Advertisement

இந்த நிலையில், தமிழக வெற்றிக் கழகத்தின் வேடபட்டி நகரச் செயலாளர் பிரகாஷ், மகாராஜனின் ஷோரூமில் பணம் செலுத்தி இருசக்கர வாகனம் ஒன்றை வாங்கியுள்ளார்.

அப்போது மகாராஜனுக்கு தமிழக வெற்றிக் கழகத்தில் இளைஞரணி பொறுப்பாளர் பதவி பெற்றுத் தருவதாகக் கூறி, அவரிடம் ஒரு லட்சம் ரூபாயை பிரகாஷ் பெற்றதாகக் குற்றச்சாட்டு எழுந்துள்ளது.

Advertisement
Coimbatore two-wheeler showroom owner Divya and her husband Maharajan raise allegations against TVK functionary Prakash over alleged misconduct, money collected for a party position, and social media harassment.

ஆனால், பணம் பெற்றுக்கொண்ட பிறகும் மகாராஜனுக்குக் கட்சியில் எந்தப் பொறுப்பும் வழங்கப்படவில்லை எனக் கூறப்படுகிறது. இதனால், தான் கொடுத்த பணத்தைத் திருப்பித் தருமாறு பிரகாஷிடம் மகாராஜன் கேட்டுள்ளார். இருப்பினும், பணத்தைத் திருப்பித் தராமல் பிரகாஷ் காலம் தாழ்த்தியதாகக் கூறப்படுகிறது.

இதனிடையே, பிரகாஷ் வாங்கிய இருசக்கர வாகனத்தின் பதிவுப் பணிகளுக்காக அந்த வாகனம் மகாராஜனின் ஷோரூமில் ஒப்படைக்கப்பட்டுள்ளது.

Advertisement

அப்போது, கட்சிப் பதவி வழங்குவதாகக் கூறி ஏற்கெனவே பெற்ற ஒரு லட்சம் ரூபாயைத் திருப்பிக் கொடுத்தால் மட்டுமே வாகனத்தை ஒப்படைக்க முடியும் என மகாராஜன் தரப்பில் தெரிவிக்கப்பட்டதாகக் கூறப்படுகிறது.

இதனால் இரு தரப்பினருக்கும் இடையே பிரச்சினை ஏற்பட்டுள்ளது.

இந்த நிலையில், நேற்று முன்தினம் பிரகாஷ் மற்றும் தமிழக வெற்றிக் கழகத்தைச் சேர்ந்த மேலும் இருவர், மகாராஜனின் இருசக்கர வாகன ஷோரூமிற்குச் சென்றுள்ளனர். அப்போது மகாராஜன் அங்கு இல்லாத நிலையில், அவரது மனைவி திவ்யா மட்டும் ஷோரூமில் இருந்துள்ளார்.

வாகனத்தை ஒப்படைப்பது தொடர்பாகப் பிரகாஷுக்கும் திவ்யாவுக்கும் இடையே கடும் வாக்குவாதம் ஏற்பட்டுள்ளது.

அப்போது, பிரகாஷ் ஷோரூமில் நிறுத்தி வைக்கப்பட்டிருந்த இருசக்கர வாகனங்களைத் தள்ளிவிட்டு ரகளையில் ஈடுபட்டதாகக் குற்றம்சாட்டப்படுகிறது. இதனால் ஆத்திரமடைந்த திவ்யா, பிரகாஷை உடனடியாக ஷோரூமில் இருந்து வெளியேறுமாறு வலியுறுத்தியுள்ளார்.

மேலும், தமிழக வெற்றிக் கழக நிர்வாகி என்றால் என்ன வேண்டுமானாலும் செய்யலாமா என்றும், கட்சிப் பதவி வழங்குவதாகக் கூறி பணம் பெற்றுக்கொண்டு ஏமாற்றியது குறித்தும் சரமாரியாகக் கேள்வி எழுப்பியுள்ளார்.

ஆனால், பிரகாஷ் அங்கிருந்து வெளியேற மறுத்ததாகக் கூறப்படும் நிலையில், இருவருக்கும் இடையே நடைபெற்ற வாக்குவாதத்தை திவ்யா தனது செல்போனில் வீடியோவாகப் பதிவு செய்துள்ளார்.

இந்த வீடியோ சமூக வலைதளங்களில் வெளியாகி பெரும் பரபரப்பை ஏற்படுத்தியது.

இந்த நிலையில், தற்போது ஷோரூம் உரிமையாளர்களான திவ்யா மற்றும் அவரது கணவர் மகாராஜன் ஆகியோர், தமிழக வெற்றிக் கழக நிர்வாகிகள் மீது மேலும் பல்வேறு குற்றச்சாட்டுகளை முன்வைத்துள்ளனர்.

குறிப்பாக, ஷோரூமில் தனக்கு எதிரே அமர்ந்திருந்த பிரகாஷ், தனது பேண்ட்டின் ஜிப்பை மூடாமல் அமர்ந்திருந்ததாகவும், இதனால் தான் கடும் மனஉளைச்சலுக்கு ஆளானதாகவும் திவ்யா குற்றம்சாட்டியுள்ளார்.

மேலும், ஷோரூமில் நடைபெற்ற வாக்குவாதம் தொடர்பான வீடியோ சமூக வலைதளங்களில் வெளியானதைத் தொடர்ந்து, தமிழக வெற்றிக் கழகத்தைச் சேர்ந்த சிலர் தன்னையும் தனது கணவரையும் ஆபாசமாகவும் அவதூறாகவும் விமர்சித்து வருவதாக அவர் வேதனை தெரிவித்துள்ளார்.

இதுகுறித்து செய்தியாளர்களிடம் பேசிய திவ்யா கூறியதாவது:-

“நாங்கள் ஆரம்பத்தில் எந்த அரசியல் கட்சியையும் சேர்ந்தவர்கள் இல்லை. தமிழக வெற்றிக் கழகத்தில் இணைந்து மக்கள் பணியாற்றலாம் என நான்தான் எனது கணவரை ஊக்குவித்தேன்.

அதன்பிறகு எனது கணவர் கட்சிப் பணிகளில் மிகவும் ஆர்வத்துடன் ஈடுபட்டு வந்தார். ஆனால், அவருக்குக் கட்சியில் பதவி வழங்குவதாகக் கூறி பணம் பெற்றுக்கொண்டு ஏமாற்றிவிட்டனர்.

ஷோரூமிற்கு வந்த நகரச் செயலாளர் பிரகாஷ், எனக்கு எதிரே தனது பேண்ட்டின் ஜிப்பை மூடாமல் அமர்ந்திருந்தார். ஷோரூமில் நடைபெற்ற சம்பவத்திற்குப் பிறகு சமூக வலைதளங்களில் என்னையும் எனது கணவரையும் மிகவும் தரக்குறைவாக விமர்சித்து வருகின்றனர்.

Coimbatore two-wheeler showroom owner Divya and her husband Maharajan raise allegations against TVK functionary Prakash over alleged misconduct, money collected for a party position, and social media harassment.

உண்மை என்னவென்று தெரியாமல் என்னைப் பற்றி ஆபாசமாகப் பேசுகின்றனர். எங்களைக் கொச்சைப்படுத்துகின்றனர்.

எங்களை விட்டுவிடுங்கள். நாங்கள் எங்காவது சென்று எப்படியாவது பிழைத்துக் கொள்கிறோம். எங்களுக்கு யாருடனும் பிரச்சினை வேண்டாம். உண்மை என்னவென்று தெரியாமல் சமூக வலைதளங்களில் என்னைக் கொச்சைப்படுத்த வேண்டாம்” எனக் கண்ணீர் மல்கத் தெரிவித்தார்.

இதனைத் தொடர்ந்து செய்தியாளர்களிடம் பேசிய அவரது கணவர் மகாராஜன், கட்சிப் பதவி வழங்குவதாகக் கூறி பணம் பெற்றுக்கொண்டு ஏமாற்றியதாகவும், இதுகுறித்து கட்சியின் முக்கிய நிர்வாகிகளிடம் புகார் அளித்தும் எந்த நடவடிக்கையும் எடுக்கப்படவில்லை என்றும் குற்றம்சாட்டினார்.

இதுகுறித்து மகாராஜன் கூறியதாவது:-

“தமிழக வெற்றிக் கழகத்தில் இணைந்த பிறகு கட்சியின் வளர்ச்சிக்காகப் பல்வேறு பணிகளில் ஈடுபட்டு வந்தேன்.

எனக்குக் கட்சியில் இளைஞரணி பொறுப்பாளர் பதவி வழங்குவதாகக் கூறி ஒரு லட்சம் ரூபாய் பணம் பெற்றனர். ஆனால், பணம் கொடுத்த பிறகும் எனக்கு எந்தப் பதவியும் வழங்கப்படவில்லை.

இதுகுறித்து கோவை மாவட்டப் பொறுப்பு அமைச்சர் சம்பத்குமாரிடம் புகார் அளித்தேன். அவர் இந்த விவகாரம் குறித்து விசாரிக்குமாறு தெரிவித்தார்.

அதனைத் தொடர்ந்து, தமிழக வெற்றிக் கழக மாவட்டச் செயலாளர் ராஜ்குமார் மற்றும் தொண்டாமுத்தூர் ஒன்றியச் செயலாளர் வெள்ளைச்சாமி ஆகியோரிடமும் புகார் தெரிவித்தேன். ஆனால், எனது புகார் மீது இதுவரை எந்த நடவடிக்கையும் எடுக்கப்படவில்லை.

மாறாக, எங்களையே குற்றம்சாட்டி மிரட்டுகின்றனர். சமூக வலைதளங்களில் என்னையும் எனது மனைவியையும் தரக்குறைவாக விமர்சித்து வருகின்றனர். தமிழக வெற்றிக் கழகத்தில் இணைந்ததற்குத் தண்டனை அனுபவிப்பதைப் போன்ற சூழல் ஏற்பட்டுள்ளது.

எங்களுக்குத் தனிப்பட்ட உள்நோக்கம் எதுவும் இல்லை. நாங்கள் கொடுத்த பணத்தைத் திரும்பப் பெற வேண்டும். எங்களுக்கு ஏற்பட்ட பாதிப்புக்கு நியாயம் கிடைக்க வேண்டும் என்பதே எங்களது கோரிக்கை” எனத் தெரிவித்தார்.

இதனிடையே, கோவையில் கடந்த வாரம் தமிழக வெற்றிக் கழக நிர்வாகி ஒருவர் பெண் நிர்வாகிக்குப் பாலியல் ரீதியாகத் தொல்லை கொடுத்ததாகக் குற்றச்சாட்டு எழுந்திருந்தது.

இந்த நிலையில், தற்போது மற்றொரு தவெக நிர்வாகி பெண் ஷோரூம் உரிமையாளரிடம் அநாகரிகமாக நடந்துகொண்டதாகவும், கட்சிப் பதவி வழங்குவதாகக் கூறி பணம் பெற்றுக்கொண்டு ஏமாற்றியதாகவும் எழுந்துள்ள குற்றச்சாட்டுகள் கோவை அரசியல் வட்டாரத்தில் பரபரப்பை ஏற்படுத்தியுள்ளன.

குறிப்பாக, கட்சிப் பதவிக்காகப் பணம் பெற்றதாக எழுந்துள்ள புகார், ஷோரூமில் நடைபெற்ற வாக்குவாதம், பெண் உரிமையாளரின் குற்றச்சாட்டுகள் மற்றும் சமூக வலைதளங்களில் அவதூறாக விமர்சிக்கப்படுவதாகத் தெரிவிக்கப்பட்டுள்ள புகார்கள் ஆகியவை விவாதப் பொருளாகியுள்ளன.

இந்தக் குற்றச்சாட்டுகள் தொடர்பாகப் பிரகாஷ் மற்றும் தமிழக வெற்றிக் கழக நிர்வாகிகள் தரப்பில் அளிக்கப்படும் விளக்கமும், புகார்கள் மீது எடுக்கப்படும் நடவடிக்கைகளும் முக்கியத்துவம் பெற்றுள்ளன.

Amazon Link 3
Sathiya Priya
Sathiya Priyahttp://newscloudscoimbatore.com
Sathiya priya is an experienced journalist with 8 years of experience across various media platforms, and for the past 5 years she has been working with NewscloudsCoimbatore (NCC). She specializes in civic affairs, social issues, and people-centric reporting with a strong focus on accuracy and credibility.

Recent News

கார்த்திகையும்… ஐயப்ப விரதமும்… பத்கர்கள் மாலை அணிந்து சபரிமலை செல்வது ஏன்?

கோவை: கார்த்திகை 1ம் தேதி பிறந்துள்ள நிலையில், ஐயப்ப பக்தர்கள் மாலை அணிந்து, விரதம் இருப்பது ஏன்? அதற்கான காரணங்கள் என்னென்ன? என்பது குறித்து இந்த செய்தி தொகுப்பில் காணலாம். தமிழ் மாதங்களில் மிகவும்...

Video

கோவையில் வீட்டை உடைத்த காட்டுயானை- வீடியோ காட்சிகள்…

கோவை: கதிர்நாயக்கன்பாளையத்தில் காட்டு யானை வீட்டை சேதப்படுத்திய காட்சி வெளியாகி உள்ளது. கோவை மாவட்டத்தில் வனவிலங்குகள் நடமாட்டம் மேற்கு தொடர்ச்சி மலை ஒட்டிய பகுதிகளில் அதிக அளவு உள்ளது. அடிக்கடி வனப்பகுதியில் இருந்து...