கோவை: கோவை மாநகர காவல் ஆணையர் கண்ணனை காத்திருப்போர் பட்டியலுக்கு இடமாற்றம் செய்து தமிழ்நாடு அரசு உத்தரவிட்டுள்ளது.
கோவை மாநகர காவல் ஆணையராக பணியாற்றி வருபவர் கண்ணன். இவர் ஏற்கனவே சென்னையில் கூடுதல் ஆணையராக பணியாற்றியவர்.
அப்போது, ஜெம் கிரைனைட் நிறுவனத்தின் தலைவர் வீரமணி என்பவர் சிறுமிகளை வீட்டில் அடைத்து பாலியல் தொல்லை கொடுத்ததாக புகார் எழுந்தது. முதலில் இது தொடர்பான வீடியோ மட்டும் கிடைத்த நிலையில், அந்த வீடியோவை வைத்து காவல்துறையில் புகார் அளிக்கப்பட்டது.
அப்போது வீடியோவில் உள்ள நபரை அடையாளம் காண முடியவில்லை என்று போலீஸ் தரப்பில் போக்சோ நீதிமன்றத்தில் கூறப்பட்டது. இதனை ஏற்க மறுத்த நீதிமன்றம், வீடியோ ஆதாரம் இருந்தும் ஒரு நபரை கண்டுபிடிக்க முடியவில்லை என்பது ஏற்கும் வகையில் இல்லை என்று கூறி, இது தொடர்பாக சம்பந்தப்பட்ட இடங்களில் ஆய்வு செய்து உரிய விசாரணை நடத்த உத்தரவிட்டது.
ஒருதலைபட்சம்
இந்த வழக்கில் போலீசார் முறையாக விசாரணை நடத்தாமல் ஒருதலை பட்சமாக செயல்படுவதாக குழந்தைகள் நல ஆர்வலர்கள் குற்றம் சாட்டினர். இந்த விவகாரம் தற்போது சூடு பிடித்துள்ள நிலையில், தற்போதைய சென்னை மாநகர காவல் ஆணையராக இருந்த அருண் மற்றும் கூடுதல் ஆணையராக இருந்த கண்ணன், கோயம்பேடு உதவி ஆணையர் யாஸ்மின் உட்பட 5 அதிகாரிகளை அதிரடியாக இடமாற்றம் செய்துள்ளது தமிழ்நாடு அரசு.
இதனிடையே, தற்போது கண்ணன் கோவை மாநகர காவல் ஆணையராக பணியாற்றி வரும் நிலையில், அவர் காத்திருப்போர் பட்டியலுக்கு மாற்றப்பட்டுள்ளார். தொடர்ந்து, மேற்கு மண்டல காவல்துறைத் தலைவர் பதவியில் இருக்கும் ரம்யா பாரதி, கோவை மாநகர காவல் ஆணையர் பொறுப்பை கூடுதலாக கவனித்துக் கொள்வார் என்று அறிவிக்கப்பட்டுள்ளது.
வழக்கு விசாரணை முறையாக நடத்தப்படாத குற்றச்சாட்டில் ஐபிஎஸ் அதிகாரிகள் காத்திருப்போர் பட்டியலுக்கு மாற்றப்பட்ட சம்பவம் காவல்துறை வட்டாரத்தில் பரபரப்பை ஏற்படுத்தியுள்ளது. இது தமிழ்நாடு அரசின் அதிரடியான நடவடிக்கை என்று பலரும் தங்களது பாராட்டுகளைத் தெரிவித்து வருகின்றனர்.
