கோவை: வெள்ளப்பெருக்கு ஏற்பட்டுள்ள நிலையில் கோவை குற்றாலம் தற்காலிகமாக மூடப்படுவதாக வனத்துறை அறிவித்துள்ளது.
மேற்கு தொடர்ச்சி மலைப்பகுதியில் தொடர்ந்து கனமழை பெய்து வருவதால், கோவை குற்றாலம் அருவியில் வெள்ளப்பெருக்கு ஏற்பட்டுள்ளது. இதையடுத்து சுற்றுலாப் பயணிகளின் பாதுகாப்பை கருத்தில் கொண்டு கோவை குற்றாலம் சூழல் சுற்றுலா இன்று (25ம் தேதி) முதல் தற்காலிகமாக மூடப்படுவதாக வனத்துறை அறிவித்துள்ளது.
கோவையின் முக்கியமான இயற்கை சுற்றுலாத் தலங்களில் ஒன்றாக கோவை குற்றாலம் உள்ளது. சிறுவாணி மலைத்தொடரில் உருவாகும் இந்த அருவி, மேற்கு தொடர்ச்சி மலையின் அடர்ந்த வனப்பகுதிக்கு நடுவே அமைந்துள்ளது. நகருக்கு அருகிலேயே மலை, வனம், அருவி என இயற்கை சூழலை அனுபவிக்க முடிவது இதன் முக்கிய சிறப்பாகும். கோவை மாநகரில் இருந்து சுமார் 35 கி.மீ. தொலைவில் இந்த அருவி அமைந்துள்ளது.
சிறுவாணி மலைப்பகுதியில் இருந்து வரும் நீரால் உருவாகும் கோவை குற்றால அருவி, மழைக்காலங்களில் நீர்வரத்து அதிகரிக்கும்போது மிகவும் அழகாக காட்சியளிக்கும். அருவியை சுற்றியுள்ள பசுமையான வனப்பகுதி, குளிர்ச்சியான சூழல் மற்றும் இயற்கை நடைபாதைகள் சுற்றுலாப் பயணிகளை அதிகளவில் ஈர்க்கின்றன. இங்கு மரக்குடில் உள்ளிட்ட சுற்றுலா வசதிகளும் உள்ளன.
கோவை குற்றாலம் வனத்துறை கட்டுப்பாட்டில் இருப்பதால், பொதுமக்கள் நேரடியாக அருவிக்குள் செல்ல முடியாது. வனத்துறை அனுமதியுடன் மட்டுமே சுற்றுலா பயணிகள் செல்ல வேண்டும். நுழைவு பகுதியிலிருந்து அருவி அமைந்துள்ள பகுதிக்கு வனத்துறை வாகனங்கள் மூலம் அழைத்துச் செல்லப்படும் நடைமுறையும் இருந்து வருகிறது.
பொதுவாக வனத்துறை அனுமதிக்கும் நாட்கள் மற்றும் நேரத்திற்கு உட்பட்டே சுற்றுலா பயணிகள் செல்ல வேண்டும். தற்போதைய நிலையில் வெள்ளப்பெருக்கு காரணமாக இன்று முதல் தற்காலிகமாக மூடப்பட்டுள்ளதால், மறு அறிவிப்பு வரும் வரை பொதுமக்கள் அங்கு செல்ல வேண்டாம் என அறிவுறுத்தப்பட்டுள்ளது.
Also Read: கோவையில் இன்று முதல் மழைக்கு வாய்ப்பு! எந்தெந்தெ நாட்களில்? முழு விவரம்!
மழை குறைந்து அருவியில் நீர்வரத்து பாதுகாப்பான நிலைக்கு திரும்பிய பிறகு, மீண்டும் சுற்றுலா அனுமதி வழங்கப்படும் என எதிர்பார்க்கப்படுகிறது. கோவை குற்றாலம் செல்ல திட்டமிடுவோர், புறப்படுவதற்கு முன் வனத்துறையின் சமீபத்திய அறிவிப்பை உறுதி செய்து செல்வது அவசியம்.
