கோவை: முதலமைச்சரை தனிப்பட்ட முறையில் விமர்சிப்பதை திமுக தலைவர்கள் தவிர்க்க வேண்டும் என்றும், அரசியல் விமர்சனங்கள் கொள்கைகள் மற்றும் மக்கள் பிரச்சினைகளை மையமாகக் கொண்டிருக்க வேண்டும் என்றும் தவெக எம்.எல்.ஏ கனிமொழி சந்தோஷ் தெரிவித்துள்ளார்.
தமிழக முதலமைச்சர் குறித்து திமுகவைச் சேர்ந்த சில தலைவர்கள் தரக்குறைவான மற்றும் அவதூறான வார்த்தைகளைப் பயன்படுத்தி தனிப்பட்ட முறையில் விமர்சித்து வருவதாகக் கூறி, தவெக எம்.எல்.ஏ கனிமொழி சந்தோஷ் கடும் கண்டனம் தெரிவித்துள்ளார்.
இதுதொடர்பாக அவர் வெளியிட்டுள்ள அறிக்கையில், அரசியலில் கருத்து வேறுபாடுகள் இருப்பது ஜனநாயகத்தின் இயல்பு என்றும், ஆட்சியின் செயல்பாடுகள், கொள்கைகள் மற்றும் மக்கள் நலத்திட்டங்கள் குறித்து விமர்சிப்பதற்கு அனைவருக்கும் உரிமை உள்ளதாகவும் குறிப்பிட்டுள்ளார்.
அதேநேரத்தில், தமிழக முதலமைச்சர் என்ற பொறுப்பில் இருக்கும் மக்கள் பிரதிநிதியை தனிப்பட்ட முறையில் இழிவுபடுத்தும் வகையில் பேசுவது அரசியல் நாகரிகத்திற்கு எதிரானது என தெரிவித்துள்ளார்.
‘பாரம்பரிய கட்சி’ என்று கூறிக்கொள்ளும் திமுக, தனது அரசியல் மேடைகளில் பயன்படுத்தப்படும் வார்த்தைகளிலும் அரசியல் நாகரிகத்தை கடைப்பிடிக்க வேண்டும் என்றும் அவர் வலியுறுத்தியுள்ளார்.
கருத்தை கருத்தால் எதிர்கொள்வதே ஜனநாயக அரசியலின் அடிப்படை என்றும், அரசியல் எதிரிகளை விமர்சிக்கும்போது அவர்களின் பதவிக்கும் தனிப்பட்ட மரியாதைக்கும் மதிப்பளிக்க வேண்டும் என்றும் கனிமொழி சந்தோஷ் தெரிவித்துள்ளார்.
மேலும், தனிநபர் தாக்குதல்களை அரசியலாகக் கருதும் போக்கை திமுக கைவிட்டு, மக்கள் பிரச்சினைகள் மற்றும் கொள்கைகள் குறித்து ஆக்கப்பூர்வமான விவாதங்களுக்கு முன்வர வேண்டும் எனவும் அவர் வலியுறுத்தியுள்ளார்.
தொடர்ந்து மரியாதைக்குறைவான தனிநபர் தாக்குதல்களில் ஈடுபட்டால், மக்கள் தங்களது ஜனநாயக சக்தியை பயன்படுத்தி அரசியலில் இருந்து ஓரங்கட்டும் நிலை உருவாகும் எனவும் அவர் எச்சரிக்கை விடுத்துள்ளார்.
முதலமைச்சர் குறித்து திமுக தலைவர்கள் தரக்குறைவான முறையில் விமர்சிப்பதை தவிர்க்க வேண்டும் என தவெக எம்.எல்.ஏ கனிமொழி சந்தோஷ் கண்டனம் தெரிவித்துள்ளார். அரசியல் விமர்சனங்கள் கொள்கைகள் மற்றும் மக்கள் பிரச்சினைகளை மையமாகக் கொண்டிருக்க வேண்டும் என்றும் அவர் வலியுறுத்தியுள்ளார்.
