கோவை: விஜய்யின் தமிழக வெற்றிக் கழகம் (தவெக) கோவையில் 6 தொகுதிகளை கைப்பற்றி இமாலய சாதனை படைத்துள்ளது.
கோவை மாவட்டத்தில் உள்ள 10 சட்டமன்றத் தொகுதிகளையும் கடந்த தேர்தலில் அதிமுக கூட்டணி கைப்பற்றியது. கோவை தெற்குத் தொகுதியை பாஜகவும், மற்ற 9 தொகுதிகளை அதிமுகவும் வென்றது.
தொடர் வெற்றியின் காரணமாக கோவை அதிமுகவின் கோட்டை என அக்கட்சியினர் கூறி வந்தனர். இந்த தேர்தலிலும் கோவையை கைப்பற்றுவோம் என அதிமுக நிர்வாகிகள் உறுதியளித்திருந்தனர்.
இதற்கிடையில், கோவையில் கணிசமான தொகுதிகளை வெல்ல திமுக சார்பில் செந்தில் பாலாஜி தீவிரமாக களமிறங்கினார். அனைத்து தொகுதிகளிலும் திமுக நிர்வாகிகள் தீவிர பிரசாரத்தில் ஈடுபட்டனர்.
இந்நிலையில், பல்வேறு பகுதிகளில் இரு கட்சிகளும் பணப்பட்டுவாடா செய்ததாக குற்றச்சாட்டுகள் எழுந்தன. குறிப்பாக கோவை தெற்குத் தொகுதியில் அதிகளவில் பணப்பட்டுவாடா நடந்ததாக கூறப்பட்டது.
இதனால் அதிமுகவினர் சிலரை பிடித்து போலீசில் ஒப்படைத்த சம்பவமும் பரபரப்பை ஏற்படுத்தியது.
இதற்கிடையில், புதிய அரசியல் கட்சியாக உருவெடுத்த விஜய்யின் தவெக, இந்த தேர்தலில் ஆட்சியை கைப்பற்றுவோம் என உறுதியாக பிரசாரம் செய்தது.
விஜய் அலை
விஜய் தமிழ்நாடு முழுவதும் சுற்றுப்பயணம் செய்து, திராவிடக் கட்சிகள் மற்றும் ஊழல் குறித்து கடுமையான விமர்சனங்களை முன்வைத்தார்.
இந்த பேச்சுகள், போதைப் பொருள் பிரச்சனை, பெண்கள் பாதுகாப்பு உள்ளிட்ட விஷயங்கள் மக்கள் மனதில் தாக்கத்தை ஏற்படுத்தின. “மாற்று அரசியல்” என்ற எண்ணம் வலுப்பெற்றது.
இதன் விளைவாக, தமிழ்நாடு முழுவதும் விஜய் அலை வீசி, 108 தொகுதிகளில் தவெக வெற்றி பெற்றுள்ளது.
முக்கியமாக, இதுவரை அரசியலில் முக்கிய ஆளுமைகளாக இருந்த பலர் இந்த தேர்தலில் தோல்வியை சந்தித்துள்ளனர்.
தவெக கோட்டை
கோவையில் பல ஆண்டுகளாக அதிமுக, திமுக கட்சிகள் ஆதிக்கம் செலுத்தி வந்த நிலையில், இந்த முறை தவெக அந்த சமன்பாட்டை முற்றிலும் மாற்றியுள்ளது.
கோவையில் சிங்காநல்லூர், சூலூர், மேட்டுப்பாளையம், கவுண்டம்பாளையம், கிணத்துக்கடவு, கோவை வடக்கு ஆகிய 6 தொகுதிகளில் தவெக வெற்றி பெற்று, கோவையை தனது கோட்டையாக மாற்றியுள்ளது.
திமுக பொள்ளாச்சி, வால்பாறை, கோவை தெற்கு ஆகிய 3 தொகுதிகளில் வெற்றி பெற்றுள்ளது. அதிமுக தொண்டாமுத்தூர் தொகுதியில் மட்டும் வென்றுள்ளது.
முன்னாள் “கோட்டை” எனக் கருதப்பட்ட கோவையில், இந்த முறை அதிமுக பல இடங்களில் மூன்றாம் இடத்துக்கு தள்ளப்பட்டுள்ளது. இது அக்கட்சித் தொண்டர்களுக்கு அதிர்ச்சியை ஏற்படுத்தியுள்ளது.
மாற்றத்தை எதிர்பார்த்து மக்கள் அளித்த இந்த பெரிய ஆதரவுக்கு, புதிய எம்எல்ஏக்கள் மற்றும் எதிர்பார்க்கப்படும் அமைச்சர்கள் வாக்குறுதிகளை நிறைவேற்றுவதே மிகப்பெரிய பொறுப்பாகும்.
