கோவை : கோவை கவுண்டம்பாளையம் பகுதியில் நள்ளிரவில் கார் கட்டுப்பாட்டை இழந்து சாலையோரத் தூணில் மோதிய விபத்தில் டிரைவர் சம்பவ இடத்திலேயே உயிரிழந்தார்.
திண்டுக்கல் மாவட்டம், ஒட்டன்சத்திரம் வட்டம் ஜாவடுப்பட்டியைச் சேர்ந்தவர் கண்ணன் (32). டிரைவரான இவர், நேற்று முன்தினம் (செப். 28) இரவு சுமார் 11 மணியளவில் கவுண்டம்பாளையம் பகுதியில் காரை ஓட்டிச் சென்றார்.
அப்போது எதிர்பாராதவிதமாக கார் கண்ணனின் கட்டுப்பாட்டை இழந்து தாறுமாறாக சென்றதாக கூறப்படுகிறது. சாலையின் வலதுபுறம் திரும்பிய கார், அவ்வழியாக சென்ற இருசக்கர வாகனம் மீது லேசாக மோதிவிட்டு, சாலையோரத்தில் இருந்த தூண் மீது பயங்கரமாக மோதியது.
இந்த விபத்தில் காரின் முன்பகுதி பலத்த சேதமடைந்த நிலையில், கண்ணனுக்கு பலத்த காயம் ஏற்பட்டது. அவர் சம்பவ இடத்திலேயே உயிரிழந்தார்.
விபத்து குறித்து தகவல் அறிந்ததும் மேற்கு போக்குவரத்து புலனாய்வுப் பிரிவு போலீசார் சம்பவ இடத்திற்கு விரைந்து சென்று விசாரணை நடத்தினர். பின்னர் கண்ணனின் உடலை மீட்டு பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர்.
இந்த விபத்து குறித்து மேற்கு போக்குவரத்து புலனாய்வுப் பிரிவு போலீசார் வழக்குப்பதிவு செய்து, கார் கட்டுப்பாட்டை இழந்ததற்கான காரணம் குறித்து விசாரணை நடத்தி வருகின்றனர்.
