கோவை : கோவை பீளமேடு பகுதியில் இரண்டு தனியார் பேருந்துகளைச் சேர்ந்த ஓட்டுநர்கள் மற்றும் நடத்துநர்கள் சாலையின் நடுவே ஒருவரையொருவர் தாக்கிக்கொண்டதாகக் கூறப்படும் சம்பவம் பரபரப்பை ஏற்படுத்தியுள்ளது. இந்த மோதல் தொடர்பான செல்போன் வீடியோ சமூக வலைதளங்களில் பரவி வருகிறது.
பீளமேடு பகுதியில் பேரூர் – பாலிடெக்னிக் வழித்தடத்தில் இயக்கப்படும் 2-ஆம் எண் கொண்ட சிவசக்தி தனியார் பேருந்தும், ஒண்டிப்புதூர் – கோவைப்புதூர் வழித்தடத்தில் இயக்கப்படும் S7 தனியார் பேருந்தும் அடுத்தடுத்து வந்ததாகக் கூறப்படுகிறது. அப்போது, பேருந்துகளின் இயக்க நேரம் மற்றும் பயணிகளை ஏற்றுவதில் ஏற்பட்ட போட்டி காரணமாக இரு தரப்பு ஊழியர்களுக்கும் இடையே தகராறு ஏற்பட்டதாகத் தெரிகிறது.
தகராறு முற்றிய நிலையில், இரண்டு பேருந்துகளின் ஓட்டுநர்கள் மற்றும் நடத்துநர்கள் சாலையில் பேருந்துகளை நிறுத்திவிட்டு ஒருவரையொருவர் தாக்கிக்கொண்டதாகக் கூறப்படுகிறது. போக்குவரத்து நிறைந்த பகுதியில் நடைபெற்ற இந்த மோதலால், வாகன ஓட்டிகள் மற்றும் பொதுமக்களுக்கு இடையூறு ஏற்பட்டதாகத் தெரிகிறது.
மேலும், பேருந்து வழித்தடத்தை மீறி இயக்கியதாகவும், உரிய நேரத்தில் பேருந்துகளை இயக்குவதில் ஏற்பட்ட போட்டியே தகராறுக்குக் காரணம் என்றும் கூறப்படுகிறது. இருப்பினும், இந்தக் குற்றச்சாட்டுகள் குறித்து அதிகாரப்பூர்வ உறுதிப்படுத்தல் வெளியாகவில்லை.
இந்தச் சம்பவத்தை அவ்வழியாகச் சென்ற ஒருவர் தனது செல்போனில் வீடியோவாகப் பதிவு செய்து சமூக வலைதளங்களில் வெளியிட்டுள்ளார்.
VIDEO
தற்போது அந்தக் காட்சிகள் இணையத்தில் பரவி வரும் நிலையில், பொதுமக்களின் பாதுகாப்பையும் போக்குவரத்து ஒழுங்கையும் உறுதி செய்ய சம்பந்தப்பட்ட பேருந்து ஊழியர்கள் மீது உரிய விசாரணை நடத்தி நடவடிக்கை எடுக்க வேண்டும் எனக் கோரிக்கைகள் எழுந்துள்ளன.
