கோவை: விளையாட்டும் படிப்பும் சம அளவில் முக்கியத்துவம் பெற வேண்டும் என்று மாணவர்களுக்கு மாநகர காவல் ஆணையாளர் கண்ணன் அறிவுறுத்தியுள்ளார்.
விளையாட்டும், படிப்பும் மாணவர்களின் வாழ்க்கையில் சம அளவில் முக்கியத்துவம் பெற வேண்டும் என்று கோவை மாநகர காவல் ஆணையாளர் கண்ணன் தெரிவித்தார்.
விளையாட்டுப் போட்டியில் பங்கேற்ற மாணவ, மாணவிகள் மத்தியில் உரையாற்றிய அவர், அடுத்த மூன்று நாட்கள் நீங்கள் பங்கேற்க உள்ள இந்த விளையாட்டுப் போட்டிகள் மிகவும் முக்கியமானவை. இந்த அனுபவங்கள் உங்களுக்கு வாழ்க்கைக்குத் தேவையான பல பாடங்களைக் கற்றுத் தரும்.
சில மாணவர்கள் விளையாட்டில் அதிக ஆர்வம் காட்டி படிப்பை புறக்கணிக்கிறார்கள். அதேபோல் சிலர் படிப்புக்கு மட்டும் முக்கியத்துவம் கொடுத்து விளையாட்டை தவிர்க்கிறார்கள். இந்த இரண்டு அணுகுமுறைகளுமே சரியானவை அல்ல.
படிப்பும் விளையாட்டும் சரியான விகிதத்தில் இணைந்திருக்க வேண்டும். படிப்பு உங்களுக்கு அறிவைக் கொடுக்கிறது; விளையாட்டு உங்களுக்கு வாழ்க்கை ஞானத்தைக் கொடுக்கிறது.
வெற்றி, தோல்வி, கடின உழைப்பு, ஒழுக்கம், விடாமுயற்சி, குழு உணர்வு போன்ற வாழ்க்கையின் பல முக்கியமான பாடங்களை விளையாட்டு நமக்கு கற்றுத் தருகிறது. சில மணி நேரம் நடைபெறும் ஒரு விளையாட்டுப் போட்டியில் கிடைக்கும் அனுபவம், வாழ்க்கையின் பல ஆண்டுகளுக்கான பாடங்களை நமக்கு உணர்த்தும்.
வாழ்க்கையில் வளரும்போது மன அழுத்தம், ஏமாற்றம் போன்ற பல்வேறு சவால்களை எதிர்கொள்ள நேரிடும். நண்பர்கள், குடும்பம், படிப்பு மற்றும் தொழில் சார்ந்த பிரச்சினைகளால் மன அழுத்தம் ஏற்படலாம். அவற்றை எதிர்கொள்ளும் மனவலிமையையும், தோல்வியை ஏற்றுக்கொண்டு மீண்டும் முன்னேறும் திறனையும் விளையாட்டு வளர்க்கிறது.
எனவே மாணவர்கள் கல்வியுடன் விளையாட்டுக்கும் முக்கியத்துவம் கொடுக்க வேண்டும். விளையாட்டில் நாம் கடைப்பிடிக்கும் ஒழுக்கம், சகிப்புத்தன்மை மற்றும் விளையாட்டு மனப்பான்மையை வாழ்க்கையிலும் கடைப்பிடிக்க வேண்டும்,” என்று மாணவர்களுக்கு அறிவுரை வழங்கினார்.
மேலும், மாணவர்களுக்காக இதுபோன்ற பெரிய அளவிலான விளையாட்டுப் போட்டிகளை தொடர்ந்து நடத்த வேண்டும் என்றும் காவல் ஆணையாளர் கண்ணன் தெரிவித்தார்.
