கோவை: பயண சேவை முடிந்து நிறுத்தப்பட்டிருந்த மினி பஸ்சை குறிவைத்த ஜோடி, உள்ளே புகுந்து திருட்டில் ஈடுபட்ட சம்பவம் சிசிடிவியில் பதிவாகியுள்ளது.
கோவை, துடியலூர் பகுதியில் நள்ளிரவில் பயண சேவை முடித்து நிறுத்தப்பட்டிருந்த மினி பஸ்ஸிற்குள் (சிற்றுந்து) புகுந்து, தங்களின் தனிமைத் தேவையைப் பூர்த்தி செய்ததோடு மட்டுமின்றி, பஸ்ஸில் இருந்த பேட்டரி மற்றும் இருக்கைகளை களவாடிச் சென்ற காதல் ஜோடியின் சி.சி.டி.வி. காட்சிகள் தற்போது கோவையில் பெரும் பரபரப்பை ஏற்படுத்தியுள்ளன.
கோவை மாவட்டத்தில் பொதுமக்களின் அத்தியாவசியப் போக்குவரத்துத் தேவைகளுக்காக துடியலூர், கஸ்தூரி நாயக்கன்பாளையம், வடவள்ளி, மருதமலை, கவுண்டம்பாளையம் உள்ளிட்ட பல்வேறு வழித்தடங்களில் ஏராளமான தனியார் சிற்றுந்துகள் (Mini Buses) தினசரி இயக்கப்பட்டு வருகின்றன.
இந்நிலையில், துடியலூர் அருகே வழக்கம் போல் தங்களது தினசரி பயண சேவையை முடித்த சிற்றுந்து ஒன்றின் ஓட்டுநரும் நடத்துநரும், அதனைச் சாலையோரம் பாதுகாப்பாக நிறுத்திவிட்டு வீட்டிற்குச் சென்றுள்ளனர்.
நள்ளிரவு 12 மணியைத் தாண்டிய வேளையில், அந்தப் பகுதிக்கு ஒரு வாலிபரும், இளம் பெண் ஒருவரும் ஜோடியாக வந்துள்ளனர். அங்கும் இங்கும் நோட்டமிட்ட அந்த ஜோடி, யாரும் இல்லாததை அறிந்து ஆள் நடமாட்டமில்லாத நேரத்தில் சத்தமில்லாமல் சிற்றுந்திற்குள் புகுந்தது.
உள்ளே நுழைந்த பின்னர் அக்கம் பக்கம் பார்த்த அந்த ஜோடிக்கு, பஸ்ஸின் உள்ளே சி.சி.டி.வி. (CCTV) கேமரா பொருத்தப்பட்டிருப்பது தெரிந்தது.
உடனே உஷாரான அந்த வாலிபர், முன் இருக்கைக்கு அருகே வந்து, பேருந்தின் உட்பகுதி நகர்வைப் படம் பிடித்துக் கொண்டிருந்த சி.சி.டி.வி. கேமராவை, யாரும் இல்லாத வெற்றுப் பகுதியை நோக்கிச் சாதுர்யமாகத் திருப்பி விட்டான். கேமராவைத் திருப்புவதற்கு முந்தைய காட்சிகள் அனைத்தும் அதில் பதிவாகியுள்ளன.
கேமராவைத் திருப்பிய பின்னர், அந்த வாலிபரும் இளம்பெண்ணும் நீண்ட நேரம் அந்தப் பேருந்திற்குள்ளேயே தனிமையில் தங்களது தேவையைப் பூர்த்தி செய்து கொண்டு இருந்துள்ளனர்.
பின்னர் அங்கிருந்து புறப்படும் போது, சும்மா செல்ல மனமில்லாமல் சிற்றுந்தின் என்ஜின் பகுதியில் இருந்த விலை உயர்ந்த பேட்டரி மற்றும் பயணிகள் அமருவதற்காக அமைக்கப்பட்டிருந்த சொகுசான குஷன் இருக்கை (Cushion Seat) உள்ளிட்டவற்றைத் திருடிக் கொண்டு தப்பியோடினர்.
மறுநாள் காலை, வழக்கம் போல் பயண சேவைக்காகச் சிற்றுந்தை இயக்க வந்த ஓட்டுநரும் நடத்துநரும், பஸ்ஸின் பேட்டரி மற்றும் இருக்கைகள் திருடப்பட்டிருப்பதைக் கண்டு அதிர்ச்சி அடைந்தனர்.
பின்னர் பஸ்ஸில் இருந்த சி.சி.டி.வி. காட்சிகளை ஆய்வு செய்தபோதுதான், நள்ளிரவில் புகுந்த காதல் ஜோடி இந்த வினோதக் கொள்ளைச் சம்பவத்தை அரங்கேற்றியது தெரியவந்தது.
வீடியோ காட்சிகள்
கோவையில் கடந்த சில நாட்களுக்கு முன்பாகவும் இதேபோன்ற ஒரு மினி பஸ்ஸில் திருட்டுச் சம்பவம் அரங்கேறியுள்ளது.
எனவே, நள்ளிரவு நேரங்களில் பேருந்துகளை இலக்கு வைத்துப் புகுந்து, இதுபோன்ற சமூக விரோதச் செயல்களில் ஈடுபடும் நபர்களைக் கண்டறிந்து கடுமையான நடவடிக்கை எடுக்க வேண்டும் என்றும், துடியலூர் மற்றும் வடவள்ளி சுற்றுவட்டாரப் பகுதிகளில் நள்ளிரவு நேர காவல் துறை ரோந்துப் பணிகளை (Police Patrolling) மேலும் தீவிரப்படுத்த வேண்டும் என்றும் சிற்றுந்து உரிமையாளர்கள், ஓட்டுநர்கள் மற்றும் நடத்துநர்கள் தரப்பில் தற்போது கோரிக்கை முன்வைக்கப்பட்டுள்ளது.
