கோவை:பெருந்துறை ரயில்வே யார்டில் தண்டவாள புதுப்பிப்பு பணிகள் காரணமாக பாலக்காடு டவுன் எக்ஸ்பிரஸ் ரயில் சேவையில் தற்காலிக மாற்றம் அறிவிக்கப்பட்டுள்ளது.
ஈரோடு (Erode) – திருப்பூர் (Tiruppur) ரயில் பாதை பிரிவில் உள்ள பெருந்துறை (Perundurai) ரயில்வே யார்டில் தண்டவாள புதுப்பிப்பு பணிகள் நடைபெற உள்ளதால் சில ரயில் சேவைகளில் தற்காலிக மாற்றம் செய்யப்பட்டுள்ளதாக சேலம் கோட்ட தெற்கு ரயில்வே நிர்வாகம் தெரிவித்துள்ளது.
இதன்படி, திருச்சிராப்பள்ளி (Tiruchirappalli) – பாலக்காடு டவுன் (Palakkad Town) எக்ஸ்பிரஸ் ரயில் எண் 16843, திருச்சிராப்பள்ளியில் இருந்து பிற்பகல் 1 மணிக்கு புறப்படும் நிலையில், ஜூன் 5 மற்றும் ஜூன் 7 ஆகிய தேதிகளில் ஈரோடு சந்திப்பு (Erode Junction) வரை மட்டுமே இயக்கப்படும்.
இதனால் அந்த நாட்களில் ரயில் சேவை ஈரோட்டில் நிறுத்தப்பட உள்ளது.
பராமரிப்பு பணிகள் நிறைவடைந்த பின்னர், அதே நாளில் ஈரோடு சந்திப்பில் இருந்து பாலக்காடு டவுன் வரை, ரயில் எண் 16843-ன் வழக்கமான நிறுத்தங்களுடன் முன்பதிவில்லா சிறப்பு ரயிலாக இயக்கப்படும் என ரயில்வே நிர்வாகம் தெரிவித்துள்ளது.
பெருந்துறை ரயில்வே யார்டில் நடைபெறும் தண்டவாள புதுப்பிப்பு பணிகளை முன்னிட்டு இந்த மாற்றம் செய்யப்பட்டுள்ளதாகவும், பயணிகள் இதனை கருத்தில் கொண்டு தங்களது பயணத்தை திட்டமிடுமாறும் ரயில்வே நிர்வாகம் கேட்டுக்கொண்டுள்ளது.
