கோவை : கோவை சரவணம்பட்டியில் வீட்டின் மாடியில் சுவற்றில் அமர்ந்து செல்போனில் பாட்டு கேட்டுக் கொண்டிருந்த 55 வயது நபர், எதிர்பாராதவிதமாக நிலைதடுமாறி கீழே விழுந்து உயிரிழந்தார்.
கோவை சரவணம்பட்டி பகுதியில் வீட்டின் மாடியில் சுவற்றில் அமர்ந்து செல்போனில் பாட்டு கேட்டுக் கொண்டிருந்தபோது, நிலைதடுமாறி கீழே விழுந்ததில் 55 வயது நபர் பரிதாபமாக உயிரிழந்த சம்பவம் சோகத்தை ஏற்படுத்தியுள்ளது.
திருச்செந்தூர் மணல்மேடு பகுதியைச் சேர்ந்தவர் தங்கராஜ் (55). இவர் கடந்த சில காலமாக கோவை சரவணம்பட்டி பூம்புகார் நகரில் தனது குடும்பத்தினருடன் வசித்து வந்தார். கட்டுமானம் உள்ளிட்ட பல்வேறு பணிகளை செய்து வந்ததாக கூறப்படுகிறது.
இந்நிலையில், நேற்று முன்தினம் தங்கராஜ் தனது வீட்டின் மாடிக்கு சென்றுள்ளார். அப்போது மாடியின் சுவற்றில் அமர்ந்தபடி செல்போனில் பாட்டு கேட்டுக் கொண்டிருந்ததாக தெரிகிறது. அவர் நீண்ட நேரம் அங்கு அமர்ந்திருந்த நிலையில், எதிர்பாராதவிதமாக திடீரென நிலைதடுமாறியுள்ளார்.
இதில் சற்றும் எதிர்பாராத வகையில் மாடியில் இருந்து கீழே விழுந்த தங்கராஜுக்கு தலையில் பலத்த காயம் ஏற்பட்டது. அவர் கீழே விழுந்த சத்தம் கேட்டு அதிர்ச்சி அடைந்த குடும்பத்தினர் உடனடியாக அங்கு சென்று பார்த்தனர். தங்கராஜ் படுகாயங்களுடன் கீழே கிடந்ததை கண்டு அதிர்ச்சியடைந்த அவர்கள், உடனடியாக 108 ஆம்புலன்ஸ் சேவைக்கு தகவல் தெரிவித்தனர்.
தகவலின் பேரில் சம்பவ இடத்திற்கு விரைந்து வந்த 108 ஆம்புலன்ஸ் மருத்துவ உதவியாளர்கள், தங்கராஜை பரிசோதித்தனர். அப்போது அவர் ஏற்கனவே உயிரிழந்துவிட்டது தெரியவந்தது. இதனால் குடும்பத்தினர் மற்றும் உறவினர்கள் அதிர்ச்சியடைந்து கதறி அழுதனர்.
இதுகுறித்து தகவல் அறிந்த சரவணம்பட்டி போலீசார் சம்பவ இடத்திற்கு சென்று விசாரணை நடத்தினர். பின்னர் தங்கராஜின் உடலை மீட்டு பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர்.
மேலும், இந்த சம்பவம் தொடர்பாக சரவணம்பட்டி போலீசார் வழக்குப்பதிவு செய்து விசாரணை நடத்தி வருகின்றனர். மாடியில் அமர்ந்திருந்தபோது தங்கராஜ் எவ்வாறு நிலைதடுமாறி கீழே விழுந்தார் என்பது குறித்தும் போலீசார் விசாரித்து வருகின்றனர்.
