கோவை: கோவை அசோகபுரம் அரசு பள்ளியில் மாணவிகளுடன் வரிசையில் நின்று காலை உணவு வாங்கி சாப்பிட்ட கனிமொழி எம்.எல்.ஏ., பின்னர் தனது தட்டையும் தானே கழுவி வைத்தார்.
கோவை துடியலூர் அருகே அசோகபுரம் அரசு மேல்நிலைப் பள்ளியில் விரிவுபடுத்தப்பட்ட காமராஜர் காலை உணவுத் திட்டத்தை கவுண்டம்பாளையம் சட்டமன்ற உறுப்பினர் கனிமொழி சந்தோஷ் தொடங்கி வைத்தார். பின்னர் மாணவர்களைப் போலவே வரிசையில் நின்று உணவை வாங்கி, மாணவிகளுடன் அமர்ந்து காலை உணவை சாப்பிட்டார்.
உணவு சாப்பிட்டு முடித்ததும் தனது தட்டை எடுத்துச் சென்ற கனிமொழி சந்தோஷ், மாணவர்கள் செய்வது போலவே தண்ணீரில் கழுவி சுத்தம் செய்து வைத்தார்.
தொடர்ந்து பள்ளியில் காலை உணவு தயாரிக்கும் சமையல் கூடத்தையும் அவர் பார்வையிட்டார். உணவு தயாரிக்கும் இடத்தை சுகாதாரமாக பராமரிக்க வேண்டும் என்றும், மாணவர்களுக்கு சுவையாகவும் தரமாகவும் உணவு வழங்க வேண்டும் என்றும் சமையல் பணியாளர்களிடம் அறிவுறுத்தினார்.
இதுகுறித்து கனிமொழி சந்தோஷ் கூறுகையில், பள்ளிக்கு வரும் மாணவர்கள் காலையில் உணவு சாப்பிடாமல் இருப்பதை தவிர்த்து, அவர்களுக்கு சத்தான காலை உணவு கிடைப்பதன் மூலம் வகுப்பறையில் கல்வியில் முழு கவனம் செலுத்தும் சூழல் உருவாகும் என்றார்.
கல்வியுடன் ஊட்டச்சத்தையும் இணைக்கும் இந்த திட்டம், மாணவர்களின் உடல் மற்றும் மனநலத்துக்கும், கல்வி முன்னேற்றத்துக்கும் உதவும் வகையில் செயல்படுத்தப்பட்டு வருவதாகவும் அவர் தெரிவித்தார்.
குறிப்பாக பொருளாதாரத்தில் பின்தங்கிய குடும்பங்களைச் சேர்ந்த மாணவர்களுக்கு இந்த திட்டம் பயனுள்ளதாக இருக்கும் என்றும், பள்ளிக்கு வரும் ஒவ்வொரு மாணவருக்கும் கல்வியுடன் ஊட்டச்சத்தையும் வழங்கும் நோக்கில் திட்டம் விரிவுபடுத்தப்படுவதாகவும் அவர் கூறினார்.
மேலும், பள்ளியில் மாணவர்களுக்கு தேவையான குடிநீர், சுகாதாரம், வகுப்பறை உள்ளிட்ட அடிப்படை வசதிகள் குறித்தும் கனிமொழி சந்தோஷ் கேட்டறிந்தார். மாணவர்கள் மற்றும் பள்ளி நிர்வாகத்தினரிடம் இருந்து கோரிக்கை மனுக்களையும் பெற்றுக்கொண்டார்.
பள்ளியின் அடிப்படை வசதிகளை மேம்படுத்துவதற்கான நடவடிக்கைகள் மேற்கொள்ளப்படும் என்றும் அவர் உறுதியளித்தார்.
