கோவை: கோவை குற்றாலம் இன்று மூடப்படுவதாக வனத்துறை சார்பில் அறிவிக்கப்பட்டிருந்த நிலையில், தற்போது நீர்வரத்து சீராகியுள்ளதால் இன்று திறக்கப்படுவதாக அறிவிக்கப்பட்டுள்ளது.
கோவை மாவட்டத்தின் முக்கிய சுற்றுலாத் தலங்களில் ஒன்றான கோவை குற்றாலம் அருவிக்கு (Kovai Kutralam Falls) சுற்றுலாப் பயணிகள் மற்றும் பொதுமக்கள் தினமும் அதிக அளவில் வந்து செல்வது வழக்கம்.
இந்நிலையில், கடந்த சில நாட்களாக மேற்குத் தொடர்ச்சி மலைப் பகுதியிலும், சிறுவாணி அடிவார அருவிப் பகுதிகளிலும் கனமழை பெய்து வருகிறது. இதன் காரணமாக, கோவை குற்றாலம் அருவியில் அவ்வப்போது வெள்ளப்பெருக்கு ஏற்படுகிறது.
நீர்ப்பிடிப்புப் பகுதிகளில் தொடர்ந்து மழை பெய்து வருவதால், ஆற்றில் நீரோட்டம் அதிகரித்து ஆபத்தான சூழல் உருவாகியுள்ளது.
சுற்றுலாப் பயணிகளின் பாதுகாப்பைக் கருத்தில் கொண்டு, விபத்துகளைத் தவிர்க்கும் பொருட்டு வனத்துறை சார்பில் அவ்வப்போது கோவை குற்றாலத்திற்குச் செல்லத் தடை விதிக்கப்பட்டு வருகிறது.
இதனிடையே, நீர்வரத்து அதிகரித்துள்ளதால் இன்று (10/10/2026) ஒரு நாள் மட்டும் கோவை குற்றாலம் சூழல் சுற்றுலா தற்காலிகமாக மூடப்படுவதாக கோவை வனக்கோட்டம் (Coimbatore Forest Division) சார்பில் அதிகாரப்பூர்வமாகத் தெரிவிக்கப்பட்டிருந்தது.
ஆனால், தற்போதைய நிலவரப்படி கோவை குற்றாலத்தில் நீர்வரத்து சீராகியுள்ளது. இதனால், கோவை குற்றாலத்திற்குச் செல்ல இன்று பொதுமக்களுக்கு அனுமதி வழங்கப்படும் என்று வனத்துறை சார்பில் அறிவிக்கப்பட்டுள்ளது.
கோவை குற்றாலம் இன்று திறக்கப்பட்டுள்ளது. நீர்வரத்து சீரானதைத் தொடர்ந்து சுற்றுலாப் பயணிகளுக்கு அனுமதி வழங்கப்பட்டுள்ளது.
Also Read: கூகுள் மேப் ரிவ்யூ செய்தால் பணம் எனக் கூறி மோசடி – கோவையில் வாலிபர் ஏமாற்றம்
