கோவை: தவெக வெற்றியை கோவை காங்கிரஸ் கட்சியினர் கொண்டாடியதால் குழப்பம் நிலவியது.
தமிழக வெற்றி கழகம் (தவெக) சட்டமன்ற தேர்தலில் பெரும்பான்மை பெற்று வெற்றி பெற்றதை தொடர்ந்து, கோவையில் காங்கிரஸ் கட்சியினர் உற்சாகமாக கொண்டாடினர்.
2026 ஆம் ஆண்டு நடைபெற்ற சட்டமன்ற தேர்தலின் வாக்கு எண்ணிக்கையில், 108 தொகுதிகளில் தமிழக வெற்றி கழகம் வெற்றி பெற்றது. இதுவரை திராவிட கட்சிகள் மாறி மாறி ஆட்சி அமைத்த நிலையில், இம்முறை புதிய அரசியல் மாற்றமாக தவெக வெற்றி பெற்றது தமிழக அரசியல் வரலாற்றில் முக்கிய நிகழ்வாக பார்க்கப்படுகிறது.
இந்த வெற்றியை முன்னிட்டு, நடிகர் விஜய் தலைமையிலான தவெக வெற்றியை கட்சி தொண்டர்கள் மற்றும் பொதுமக்கள் பல்வேறு இடங்களில் கொண்டாடி வருகின்றனர். அதன் ஒரு பகுதியாக, கோவை டவுன்ஹால் பகுதியில் காங்கிரஸ் கட்சியின் இளைஞரணி சார்பில், மாவட்ட துணைத் தலைவர் பைசல் தலைமையில் பட்டாசு வெடித்தும், பொதுமக்களுக்கு இனிப்புகள் வழங்கியும் கொண்டாட்டம் நடைபெற்றது.
தவெக வந்தாச்சு, காங்கிரஸ் வெற்றி என்ற முழக்கங்களுடன் விசில் அடித்து உற்சாகத்தை வெளிப்படுத்தினர்.
இந்நிலையில், தவெக வெற்றியை காங்கிரஸ் கட்சியினர் கொண்டாடியதால், திமுக கூட்டணி கட்சியினரிடையே குழப்பம் ஏற்பட்டுள்ளதாக கூறப்படுகிறது.
