கோவை: கோவை குனியமுத்தூரில் அறைக்குள் அத்துமீறி நுழைந்து, இளைஞர்களை ஹெல்மெட் மற்றும் இரும்புக் கம்பியால் தாக்கி, கொலை மிரட்டல் விடுத்ததாக 12 பேர் மீது போலீசார் வழக்குப்பதிவு செய்து விசாரணை நடத்தி வருகின்றனர்.
சிவகங்கை மாவட்டம் திருப்புவனம் பகுதியைச் சேர்ந்தவர் வைத்தீஸ்வரன் (20). இவர், கோவை குனியமுத்தூர் விஜயலட்சுமி மில்ஸ் பகுதியில் உள்ள ஒரு வீட்டின் முதல் தளத்தில் நண்பர்களுடன் அறை எடுத்துத் தங்கி வேலை செய்து வருகிறார்.
சம்பவத்தன்று இரவு வைத்தீஸ்வரன் தனது நண்பர்களுடன் அறையில் பேசிக்கொண்டிருந்தார். அப்போது, அவருக்கு ஏற்கெனவே அறிமுகமான கார்த்திகேயன் உள்ளிட்ட 12 பேர் கொண்ட கும்பல், அறையின் கதவை உடைத்துக்கொண்டு உள்ளே புகுந்ததாகக் கூறப்படுகிறது.
அவர்கள் வைத்தீஸ்வரனையும் அவரது நண்பர்களையும் தகாத வார்த்தைகளால் திட்டி ரகளையில் ஈடுபட்டுள்ளனர். இதனைத் தட்டிக்கேட்டபோது, அந்தக் கும்பல் தாங்கள் கொண்டுவந்திருந்த ஹெல்மெட், இரும்புக் கம்பி ஆகியவற்றாலும், கைகளாலும் கால்களாலும் அவர்களைச் சரமாரியாகத் தாக்கியதாகப் புகாரில் தெரிவிக்கப்பட்டுள்ளது.
இந்தத் தாக்குதலில் வைத்தீஸ்வரனுக்குப் பலத்த காயம் ஏற்பட்டு ரத்தம் கொட்டியுள்ளது. தொடர்ந்து, இரும்புக் கம்பியைக் காட்டி, அங்கு தங்கியிருந்தால் உயிரோடு விடமாட்டோம் என மிரட்டிவிட்டு அந்தக் கும்பல் தப்பிச் சென்றுள்ளது.
காயமடைந்த வைத்தீஸ்வரன் மற்றும் அவரது நண்பர்களை அங்கிருந்தவர்கள் மீட்டு மருத்துவமனையில் சிகிச்சைக்காகச் சேர்த்தனர். இதுகுறித்து வைத்தீஸ்வரன் குனியமுத்தூர் காவல் நிலையத்தில் புகார் அளித்தார்.
புகாரின் பேரில் போலீசார் மேற்கொண்ட விசாரணையில், ராஜா என்ற ராஜராஜன், ஹரி என்ற ஹரிஹரன், விஷ்வா, சரண், நிருபன், கார்த்திகேயன், விபினித் மாணிக்கம், கேசவ மூர்த்தி, பவந்த், அப்துல் ரகுமான், தருண்குமார், ராஜ்குமார் ஆகிய 12 பேர் தாக்குதலில் ஈடுபட்டதாகத் தெரியவந்தது.
இதையடுத்து, அவர்கள் 12 பேர் மீதும் போலீசார் வழக்குப்பதிவு செய்து, தாக்குதல் சம்பவம் தொடர்பாகத் தீவிர விசாரணை நடத்தி வருகின்றனர்.
