கோவை: உக்கடம் பேருந்து நிலையத்தில் முதியவரிடம் செல்போன் திருடிய ஒடிசா வாலிபரை பொதுமக்கள் பிடித்து போலீசாரிடம் ஒப்படைத்தனர்.
கோவை உக்கடம் புதிய பேருந்து நிலையத்தில் முதியவரின் சட்டைப் பையில் இருந்து செல்போனை திருடிய ஒடிசா மாநிலத்தைச் சேர்ந்த வாலிபரை பொதுமக்கள் கையும் களவுமாக பிடித்து போலீசாரிடம் ஒப்படைத்தனர்.
கோவை செல்வபுரம் நஞ்சப்பா கார்டன் பகுதியைச் சேர்ந்தவர் ஜெகநாதன் (58). இவர் தனது நண்பர் சுகுமாறனுடன் மஞ்சனூர் செல்வதற்காக நேற்று காலை உக்கடம் புதிய பேருந்து நிலையத்திற்கு வந்துள்ளார்.
அப்போது பாலக்காடு செல்லும் அரசுப் பேருந்தில் ஜெகநாதன் ஏற முயன்றதாக கூறப்படுகிறது. அந்த நேரத்தில் அவருக்குப் பின்னால் வந்த நபர் ஒருவர், ஜெகநாதனின் சட்டைப் பையில் இருந்த செல்போனை நைசாக திருடியுள்ளார்.
சட்டைப் பையில் கை வைப்பதை உணர்ந்த ஜெகநாதன், உடனடியாக “திருடன்… திருடன்…” என கூச்சலிட்டுள்ளார். அவரது சத்தம் கேட்டு உஷாரான நண்பர் சுகுமாறன் மற்றும் அங்கிருந்த பயணிகள், தப்பியோட முயன்ற அந்த நபரை சுற்றி வளைத்து பிடித்தனர்.
பின்னர் அவரை உக்கடம் காவல் நிலையத்திற்கு அழைத்துச் சென்று போலீசாரிடம் ஒப்படைத்தனர். போலீசார் நடத்திய விசாரணையில், பிடிபட்டவர் ஒடிசா மாநிலத்தைச் சேர்ந்த தாஸ் சான்டு (21) என்பது தெரியவந்தது.
இதையடுத்து போலீசார் வழக்குப்பதிவு செய்து, அவரிடமிருந்து திருடப்பட்ட செல்போனை பறிமுதல் செய்தனர். தொடர்ந்து அவரை நீதிமன்றத்தில் ஆஜர்படுத்தி சிறையில் அடைத்தனர்.
